22.08.2008 15:39

David farinn heim á leið.

Jæja þá er vinur okkar farinn heim til Atlanta. Reyndar flýgur hann til Minneapolis og verður að gista þar í nótt og svo heim í fyrramálið. Við vorum að koma frá því að keyra hann upp í Flugstöð. Í gærkvöld héldum við smá kveðjupartý fyrir hann og við vorum hér þrettán samankomin í mat og alles. Maddý Gísli Stefanía Ölli Benni Hemmi Guðrún Jóhanna Garðar og Vilmundur. Bjössi er á Norðurlandinu núna í heimsókn hjá vinum og vandamönnum.

En áður en við fórum áðan vorum við að horfa á handboltastrákana okkar. Þvílíkir strákar! Að vinna með sex marka mun!!! Svo þá eru þeir annað hvort komnir með gull eða silfur..Váá. Flottir.

En í gær hringdi bæklunarlæknirinn minn með niðurstöðurnar úr segulómmyndatökunni. Og þær niðurstöður voru þær að ég þyrfti að fara í aðgerð á hnénu. Allt í klessu þar. Enda er ég sko búin að finna verulega fyrir því í sumar og það hefur farið versnandi.

Ég hef samt verið að hjóla og það gerir örugglega gott en ef ég þarf að stoppa hjólið og stíga af því verð ég að passa að stíga í vinstri fót annars dett ég bara!!! Það gerðist nú síðast þegar ég var að kíkja eftir kálfunum hjá Bjössa í júlí. Tók skarpa beygju til hægri og búmm á malbikið kylliflöt. Krakkarnir voru hjá mér og þeim brá meira en mér þessum elskum og komu hlaupandi. En þann15.september á ég að fara í þessa aðgerð..

Ætli ég láti þetta ekki duga í dag. Eigið góða helgi gæskurnar.
Silla...

19.08.2008 10:57

Gestkvæmt.

Góðan dag. 
Það hefur verið gestkvæmt undanfarið. Í fyrradag komu Jóna Bergþóra og Laufey Björg með börnin auk mömmu. Svo á nokkrum dögum hafa fjórar af fimm dætrum Dúnu kíkt í Heiðarbæinn. Í gærkvöld komu svo Sigfús, Erla Jóna og Ágúst í kvöldmat. 

Það var svo stillt veður að ég prufaði að hjóla eftir kvöldmatinn að Gálgum sem er við nýja Ósabotnaveginn. Það gekk vel en auðvitað er þægilegra að hjóla á malbiki en svona malarvegi. Og ekkert bólar á olíumölinni á þessum vegi.

Reynir og Día komu hér eitt kvöldið. Svo alltaf fjölgar þeim sem vita hvar Heiðarbærinn er..

Og ég er búin að fá lánað hús hjá Verkalýðsfélaginu mínu. Það er á Akureyri. Svo þá verður rólegheit þegar sumir komast á sjötugsaldurinn. Og mig hlakkar til að heimsækja frændfólkið fyrir norðan ekki síst þau nýfæddu

En nú er ég að fara að tygja mig í æfingar. Í gærmorgun fór ég í segulómskoðun í Rvík sem ég veit ekki hvort nokkuð kemur út úr. Ég heyri í lækninum á fimmtudag um það.

En ég læt þetta duga í bili..Stutt og laggott ekki satt.
Kveðja til ykkar allra.
Silla

15.08.2008 11:01

Ný myndaalbúm!


 Hæ öll.
Ég ætla að setja inn nokkur orð.
Það er komið eitthvað af nýjum myndum inn í myndaalbúmin og fleiri á leiðinni. Konný er að setja inn fyrir mig og Linda tók nokkrar myndir í byrjun ágúst af umhverfinu hérna. Nú erum við nýbúin að slá og grasið orðið eins og flauelsteppi! 

En annars er lítið að frétta. Allt gengur sinn vanagang og mikil vinna hjá genginu í Búrfelli. David fer heim eftir viku en hann hefur verið að vinna með Gunna. Held að það verði fagnaðarfundir í Atlanta þegar hann kemur út til Stacey sinnar. ..Jú annars ein stór og góð frétt! Barnabarn númer þrettán á leiðinni..Konný að koma með sitt þriðja.

Ég hef verið í æfingum í Átak (sjúkraþjálfun) í Keflavík undanfarið. Tók mér smáfrí yfir sumartímann. En Gunnar Brynjólfur Gunnars bæklunarlæknir vill endilega að ég haldi mér við Átaksfólkið allavega næstu mánuðina. Eins og hjá svo mörgum sem lenda í einhverskonar slysum þá eru eftirköstin oft fyrir hendi. Það virðist vera í mínu tilfelli . Svo er ég þó nokkuð dugleg að hjóla og ekki hefur veðrið verið til trafala undanfarið. Svo frábært flesta daga.

En ég læt þetta nægja að sinni. Kíkið endilega í albúmin.
Kveðja úr Heiðarbænum.
Silla.

12.08.2008 17:38

Norðanfólk í heimsókn.



Halló halló..


Ég ætla svona rétt að kíkja á bloggið og láta vita af mér. Það er sama blíðan. Og þannig er það bara í svona veðri að allt verður svo miklu skemmtilegra. Og sumarið er langt komið og hefur verið bara ljúft. Að vísu hefur kellan ekki farið miklið að heiman en þeim mun fleiri hafa verið hér hjá mér í Heiðarbænum...

Og í dag fékk ég fullt af góðum gestum. Norðanfólkið mitt eins og ég segi gjarnan um skyldmennin sem búa á norðurlandinu. Sigga Magga elsta dóttir Dúnu systir með alla fjölskylduna sem er auðvitað Styp hinn Hollenski og börnin fjögur. Þau voru nýkomin úr ferð til Danmerkur og Hollands. Þar (í Dk) voru þau að halda upp á tíu ára útskriftarafmæli úr kennaraháskóla (sem þau kynntust í)..



Og með henni var Solla systir hennar með Arndísi Dúnu og Lárus son Laufeyjar .. Auðvitað á öðrum bíl ..annars hefði þurft rútu ..Mamma var með þeim og svo var Linda stödd hér með dætur sínar og hundinn Flugu. Og svo býr Solla í höfuðborginni þó ég vilji helst setja samasemmerki við börn systra minna fjögurra sem allar fluttu til norðurlands og búa þar flest. Svo kom Elín líka og Bjössi kíkti á þær áður en hann fór í árlegann veiðitúr þeirra vinnufélaga í Nesfisk upp við Djúpavatn.


En þegar Sigga ætlaði að leggja af stað var bíllinn rafmagnslaus svo nærtækasta og besta ráðið var að fá Ölla frænda með startkaplana. Og auðvitað var gaman fyrir þau að hittast. En rúsínan í pylsuendanum (heimsókninni) hjá krökkunum var að fara í berjamó! Og þau þurftu ekki að fara langt því berin eru í meters fjarlægð frá húsinu! Og þvílíkt hvað það var gaman hjá þeim. Linda tók nokkrar myndir og ég ætla að biðja
hana að senda mér þær ..



Svo í dag voru hér í blíðunni á annann tug gesta.. En Gunni og David og allir í Fúsa ehf eru á fullu að vinna. Ég á ekki von á að þeir komi fyrr enn seint í kvöld eins og vanalega. En þetta er veðrið sem þarf að vera í þeirra atvinnu! En ég vona að mér takist að fá hann til að taka smáfrí í byrjun september!

En nóg að sinni.
Kveðja úr Heiðarbæ.
Silla.   

06.08.2008 10:05

Afmælisbörn.

Góðan daginn.

Þau eru nokkur barnabörnin mín sem eiga afmæli í ágúst. Þar ber fyrst að nefna Ástrós Önnu Vilhjálmsdóttur sem er fædd 3. ágúst, bróðir hennar Vilmund Árna Vilhjálmsson sem á daginn í dag 6. ágúst. Ágúst Þór Sigfússon er fæddur 10. ágúst og Sigurbjörg Eiríksdóttir nafna mín á afmæli 17. ágúst. Svo þriðjungur þeirra tólf barnabarna sem ég á eru fædd í mánuðinum. Og svo er september stór mánuður hjá fjölskyldunni!!

Þetta eru því tilhlökkunardagar hjá mörgum af þeim yngri. Og eflaust er það alveg fram til tvítugs sem við bíðum eftir að eldast en svo held ég að hægi nú á þeim væntingum..En ég ætla á eftir að skreppa til höfuðborgarinnar. Þar verður jarðsungin gömul vinkona, Ragnhildur Kristín Sandholt og ég ætla að fylgja henni síðasta spölinn.

Það er enn sama blíðan hér um slóðir þó eitthvað hafi hitinn lækkað. Enda var hann óvenju hár um daginn. Fór upp í 23 stig í forsælu hér. Í dag er hann 14. stig og það er svona meira það sem við þekkjum.

En ég ætla ekki að hafa þetta lengra..Aðeins að láta vita af mér.
Kveðjur til ykkar úr Heiðarbænum.
Silla.

02.08.2008 21:51

Ferðahelgin mikla.


Góða kvöldið...

Jæja nú í blíðunni er hið besta ferðaveður.. 
Enda hin sívinsæla verslunarmannahelgi!
Og hún skipti máli í den en er bara löng fríhelgi hjá okkur gamla settinu núna.... Samt fórum við á rúntinn í dag og heimsóttum Sigfús, Erlu Jónu og Ágúst sem eru í hjólhúsinu sínu að Hellishólum í Fljótshlíð. Ég vona að Sigfús nái að hvíla sig því vinnuharkan hefur verið mikil hjá þeim í Búrfelli undanfarið.

Upphafleg áætlun fyrir þessa helgi var að kíkja á málverkasýningu á Minni Borg í Grímsnesi sem Ragga, gömul vinkona mín hafði boðið okkur á. Sú sýning átti að standa frá 12.júlí til 3.ágúst. Svo eina helgin sem ég vissi að við Gunni værum laus var þessi. En áfallið var mikið þegar ég frétti að Ragnhildur Kristín Sandholt væri dáin.

Svona er lífið stundum. Ég hefði bara átt að fara ein við opnunina..... Og hún Ragnhildur mín verður jarðsett á miðvikudaginn næsta. Ég heimsótti hana síðast 2006 ásamt Maddý og þá hafði hún gengið í gegn um fyrstu þrekraunir krabbameinsins. En helstu samskipti okkar Röggu hin síðari ár hafa verið jólakortin sem hafa oftast verið sem löng sendibréf.

Eins og ég hef áður sagt verða vinkonur ávallt vinkonur. Alveg sama þótt líði langur tími milli samfunda. Þannig var það með okkur Röggu. Vissum alltaf hvor af annarri. Héldum þræðinum þótt oft væri hann svolítið smágerður. En hann slitnaði aldrei.

En reynum að snúa okkur að öðru. Ég hef fengið snúrustaura í Heiðarbæ. Gunni og David settu þá upp fyrir mig í gær. Og ég er svo gamaldags að mér finnst það heimilislegt að geta hengt út þvottinn minn...Er þegar búin að þurrka þvott af rúminu okkar!

En kæru vinir ..hafið það sem best í góðviðrinu.
Ykkar Silla.

29.07.2008 15:09

Hjóla, hjóla!


Sæl öll. 
Ég þurfti að skreppa í Sandgerði og hafði nægan tíma eða þannig..Ég ákvað að ég skyldi sko hjóla. Ég hef hjólað í sumar til Sandgerðis en þá bara aðra leið .. Oftast læt ég duga að hjóla inn í Hvalsneshverfið. Nú var alveg frábært hjólaveður, hæg norðanátt og þetta gekk nú bara aldeilis vel. Ég fór í Pósthúsið með pakka til Danmerkur og fór svo með eitthvað nesti (óhollustu) til tengdó. Að lokum hjólaði ég svo til Lindu þar sem Konný var stödd með Arnar Smára. Þetta var bara hressandi æfing. Það eru um það bil 8 km aðra leiðina í Sandgerði. Það mætti vera oftar svona hjólaveður!

En ég verð nú að viðurkenna að ég fer hægar yfir heldur en í gamla daga. Þá var ég oftast 20-25 mínútur á leiðinni sem þá var á malarvegi. Í dag er malbik. Nú var ég 40 mínútur aðra leiðina og 35 mín til baka. En það er nú ekki aðalmálið. Ég varð reyndar hugsi yfir einu.. Litlu krakkarnir eru allir með hjálma en ég sem ætti að vera fyrirmynd var berhöfðuð..Þarf að bæta úr því sem fyrst.

En það eru allir í Fúsa ehf uppi í Búrfelli eins og venjulega. Veit ekki hvort Gunni og David gista þar í nótt eða ekki. Nesmúrsmenn voru að ljúka við að pússa neðri hæðina (kjallarann) Þeir voru sex daga samtals þó ekki allann daginn alltaf. Svo er bara að vona að verðið verði sanngjarnt. Við höfum fína reynslu af þeim félögum í Nesmúr..svo þetta verður örugglega í góðu.

Adda Hafborg kom áðan með smávegis sem ég átti hjá henni. Hún hefur aldrei komið í Heiðarbæinn og leist alveg ljómandi á staðinn.. Sagði eins og svo margir að hér væri svo róandi að koma. 

Ég ætla að láta hér staðar numið um sinn. Bestu kveðjur úr Stafneshverfinu!
Ykkar Silla. 


26.07.2008 15:52

Að græða upp landið.


Góðan og blessaðan daginn. 
Nú er frekar rólegt í Heiðarbænum. Reyndar eru Petró, Carlos og Carmen í helgargistingu. Það eru tjúáahundarnir hennar Svandísar. Hún er ásamt fjölskyldunni á skátamóti á Akureyri. Hér er sól og frekar heitt en hávaðarok. Ég geri ráð fyrir að góða veðrið sé fyrir norðan og austan og bara undarlegt að skuli ekki rigna hér. Í gær var ég að reyta arfa þegar Ölli stoppaði og sagði mér að hitinn hefði verið 19 gráður. Það var líka þvílík blíða og hægur vindur í gær.

Ég var að viðra hundana áðan og skemmtilegt hvað þeir (gestahundarnir) muna vel eftir sér síðan fyrr í sumar. Gegndu strax þegar ég kallaði á þá. Reyndar lumaði ég á harðfisk til vonar og vara. Gunni og David eru uppi í Búrfelli við vinnu. Eru þar að festa niður plötur. Það er ekki gerður greinarmunur á laugardögum og öðrum dögum. Ég held að þeir ætli samt að taka sér gott frí allir um næstu helgi (verslunarmannahelgina).

Við Jóhanna ætlum að fara í bíó í kvöld. Ég er nú ekki mikil bíókerling en mig langar að sjá þessa mynd. Hún heitir Mamma mía og er með Meril Streep.

En það sem ég ætlaði að blogga um var aðallega uppgræðsla og umhverfismál. Ég las á bloggsíðu á mbl.is hjá honum Halli Magnússyni að honum er skelfilega illa við Lúpínuna. En ég held nú að það sé alls ekki sama hvar henni er sáð. Það er að segja í hvernig umhverfi. Hér í kring alveg frá Höfnum að Hvalsnesi er hraun og lítið um mela og móa. En fólkinu hér um slóðir og áður landgræðslunni hefur tekist að græða upp mikið á milli hraungrýtis og klappa. Þar á meðal er orðið þó nokkuð mikið af Lúpínu. Mér finnst hún eiga fullann rétt á sér í þannig tilfellum. Sumir kalla hana illgresi en mér sýnist hún nú stoppa við grasjaðra. Það þarf kannski að fylgjast með henni blessaðri EN mér finnst hún flott.

Svo höfum við skötuhjúin verið að reyna að laga til í okkar nánasta umhverfi. Við tyrftum í júní eins og ég sagði áður og ég var með vatnið á lofti í margar vikur vegna þurrks. En nú er bletturinn orðinn vel grænn og þá erum við að ná því takmarki að skilja hvergi eftir okkur opin sár í kring um Heiðarbæinn. Svo hef ég gróðursett nokkur tré sem öll hafa nöfn. Tvær aspir heita Ása og Geiri vegna þess að flest allt hefur jú verið keypt af þeim í gróðrastöðinni Glitbrá. Frábært hvað hefur tekist vel til hjá þeim. Sigrún vinkona gaf mér eina í vor og hún heitir auðvitað Sigrún.  Svo setti ég niður tvö birkitré. En ég þarf að verja þessar plöntur vel yfir veturinn. Gaman að geta þess að ösp sem ég setti niður fyrir 12-13 árum í horni hér í garðinum er í fullu fjöri þó svo ég hafi lítið sinnt henni fyrr en síðustu árin.

Svo eru grjótgarðarnir að komast í rétt útlit. Ég er búin að hlaða þá upp að mestu. Gaman að geta haldið við þessum bráðum 200 ára görðum. (Sumir halda að hér hafi verið réttir). En þeir voru í notkun þegar ég var krakki en þó sumir aflagðir. Hér ræktaðu foreldrar mínir kartöflur og við systkinin fengum að hafa sér parta og seldum svo uppskeruna á haustin.  Reyndar var kartöfluræktin þó nokkur hjá fólki hér um slóðir. Það var líka mikið ræktað af rófum og var Sigurbjörn heitinn á V-Stafnesi með stærstu ræktendum hér þá. Margir muna eftir honum því hann hélt lengi í rófuræktina.

En ætli ég láti þetta ekki duga.Vona að þið nennið að lesa rausið mitt.
Bestu kveðjur. 
Silla.


22.07.2008 10:56

Ferðalangar.

 

 Sæl öll nær og fjær.

Jæja nú eru barnabörnin farin heim til Danmerkur. Þetta var góður tími og vonandi hafa þau haft gaman og gott af verunni hjá okkur á Íslandi. Þau voru samt ánægð að vera að fara heim til mömmu og pabba þó heyrst hafi raddir um að best væri að búa á Íslandinu góða.

Þegar Eiríkur hringdi til að láta vita að þau væru komin á danska grundu spurði hann hvar hjólastóllinn væri?.. Haaa.. Jú Helga sem er spastiskur í fótunum sínum var ekið út í hjólastól þegar þau komu til landsins. Við töldum víst að stóllinn væri úr flugstöðinni og skildum hann þar eftir. Og ekki sögðu krakkarnir neitt yfir því. Enda Helgi hinn duglegasti að hjálpa til..Góður og greindur strákur sem vildi alltaf vera að færa fyrir ömmu vatnið á blettinum í þurrkinum.

En ég hringdi áðan upp í tapað fundið í FLE og nú er verið að leita að hjólastólnum. En heimferðin gekk vel en líklega hefur hann verið orðin lúin á göngunum á Kastrup. Það var fleira sem gleymdist. Mikki mús hennar Sigurbjargar kúrði á stól í borðstofunni og lét ekkert fyrir sér fara.

En nú er búið að rigna vel í tvo sólarhringa. Gott fyrir grasið mitt og trén. Vona að þetta verði samt ekki langvinn vætutíð. Og þá er ég að hugsa um strákana mína sem vinna nú alla daga í Búrfelli. En sumt er víst hægt að gera í vætunni.

En rétt í þessu var verið að hringja úr Flugstöðinni og stóllinn bíður eftir mér þar.. Við Ástrós ætlum að fara og sækja gripinn!
Og nú eftir hádegi kemur Bjössi heim frá Tenerife ásamt stelpunum og Aron Darra.

Læt þetta duga í bili. Bestu kveðjur.
Silla.

17.07.2008 13:01

Sól, hiti, börn og dýr.


Halló,halló.

Nú er sól og sumar og varla bloggveður. Við fórum í sund í gær með krakkana við Jóhanna og þá voru 17 gráður og ekki stanslaus sól. Nú er BARA blíða og steik. Helgi, Garðar, Vilmundur, Sigurbjörg og Jóhann eru hér í dag. Systurnar Konný og Jóhanna skruppu í bæjarferð. Það var verið að borða pylsur eins og Íslendingar gera ..

Og svo eru það kálfarnir hjá Bjössa. Þeir tolla sko ekki í girðingunni og finnst grasið miklu betra og grænna hinu megin. Var að kíkja á þá áðan.. Strákarnir frá Nesmúr eru að pússa kjallarann, Voru áður búnir að fara fyrstu umferð..

En um helgina fara systkinin til pabba Lilju. Sennilega á morgun. Og ég ætla ekki að sitja lengi við tölvuna í dag. Bið að heilsa ykkur öllum. Kveðja úr sól og sumri í Stafneshverfi......  ..

13.07.2008 12:10

Væta.

Góðan dag.

Það er rigning í dag og í gær. Kærkomin væta fyrir gróðurinn og komið að hvíld hjá Búrfellsgenginu. Þeir hafa unnið stanslaust án þess að taka dags frí í þrjár vikur. Svo ég held að þeir njóti rigningarinnar. Það gengur samkvæmt áætlun og yfirmenn hjá Landsvirkjun ánægðir með það sem af er.

David er hjá okkur og þeir Gunni voru átta tíma í gær að vinna við einhverja hluti (úr virkjuninni) hjá Fúsa ehf í Sandgerði. Hluti sem verða svo fluttir fullmálaðir uppeftir. Einn meiddi sig hjá þeim í vikunni. Fékk yfir sig sand á fullum þrýstingi og það skárust í sundur fötin hjá honum og bakið fékk fyrir ferðina. Hann verður vonandi vinnufær eftir helgi. Hann er nú að jafna sig held ég.

Bjössi er á Kanarí með tveim dætrum og barnabarni. Hefur það vonandi gott. Við Aron erum að huga að hundum og nautum á meðan. Svo var heilmikið um að vera í vikunni í túnslætti. Sá sem fékk að slá hjá honum (Bjössa) kom með stórvirkar vélar og mannskap og nú er allt þurrt og fínt í böggum.

Lilla vinkona kom í fyrrakvöld og fór í gær. Við grilluðum og fengum okkur rauðvín með matnum og þá er ekki um að ræða að aka eitt eða neitt. Það var mikið spjallað og hlegið. Jóhanna kom í gærkvöld í afgangana og hún er að vinna alla helgina. Eftir það er hún að taka tvær vikur í sumarfrí. Komin tími á frí hjá henni. Hún vinnur mikla álagsvinnu.

Eiríks og Lilju börn eru í Reykjavík hjá mömmu hennar og Helga manninum hennar. Ég held að þau komi aftur í kvöld en ég þarf að hafa samband og athuga það. Þau verða líklega að einhverju leyti hjá Jóhönnu næstu daga. Vilmundur er að koma frá pabba sínum úr fríi í kvöld. Um næstu helgi fara þau í heimsókn til pabba Lilju og Bjarteyjar konu hans. Heim til Danmerkur fara þau á mánudag eftir rúma viku.

En ég læt þetta duga í bili...
Kveðjur til ykkar.
Silla.

09.07.2008 10:48

Sumartími.


Hæ öll..Það er nóg að gera á bæ núna. Börnin í heimsókn frá Dk. Þau eru búin að vera fimm nætur en sváfu eina nótt hjá Jóhönnu. Þau fóru í pottinn hjá Konný í gær nema Þorsteinn Grétar. Ég fer með þau eftir hádegi í Sandgerði til að þau geti heimsótt vini sína.

En í kvöld kemur David vinur okkar frá Atlanta. Hann ætlar að aðstoða Gunna eitthvað því þar á bæ (í vinnunni) er nóg um að vera. David er á lausu þessa stundina. En um helgina geri ég ráð fyrir að krakkarnir heimsæki ömmur og afa í Rvík. Eftir það verður Vilmundur kominn úr fríinu hjá pabba sínum. Þau Sigurbjörg eru góðir vinir svo það verða fagnaðarfundir.

En í þessari sumarblíðu sem hefur verið er ekki hægt að vera mikið í bloggi. Bara hreint ekki. Reyndar hefur oft verið skýjað eða þokubakkar framan af degi enn að öðru leiti frábært veðurfar.

Segi þetta gott.
Kveðjur til ykkar úr Heiðarbæ.
Silla

06.07.2008 17:25

Frænkurnar :)

Myndir af stelpunum 3 :) vantar bara Ástrósu



Sætar frænkur. Þrjár af barnabörnunum tólf, þær Sigurbjörg með Júlíu Lindu og Hrafntinna:)

04.07.2008 18:30

Barnabörn.


Góða kvöldið.
Nú er ég að búa mig undir að krakkarnir frá Lysabild í Danmörku komi í heimsókn. Þau koma seint í kvöld. Sennilega á miðnætti. Þetta eru þau Þorsteinn Grétar, Helgi Snær og Sigurbjörg Eiríks og Liljubörn. Þau eru sennilega að mæta á Kastrup núna þegar ég er að pikka þetta. Þau verða hér til 21.júlí og mér er sagt að þau hlakki rosalega mikið til að koma.

Það er ekki neitt skrítið. Það er líka gaman að hitta vini og frændsystkin sem búa hér flest í Sandgerði. Jóhanna er fyrir norðan núna en Garðar Ingi, Ágúst Þór og Helgi Snær eru á svipuðum aldri. Þau systkin verða að vera róleg í sveitinni fyrst um sinn.

Svo munu þau fara einhverja helgina og heimsækja afana og ömmurnar í Reykjavík. Svo hjónakornin á Jótlandi munu hafa það náðugt. Eiríkur er búin í prófunum og gekk bara vel. Mér skilst að þau ætli að útbúa sér pall við húsið á meðan þau eru barnlaus.

En nú er allt á fullu hjá Fúsagengi í Búrfellsvirkjun. Ég ferjaði bíl með Gunna þangað í gær seinnipartinn.. Ótrúlegt hvað það getur verið lýjandi að keyra lengi. Svo fór Gunni aftur í dag uppeftir. Það er nóg starf að vera svona reddari eða hvað við getum kallað snúningana sem hann sinnir.

Ástrós Anna er að fara í útilegu með Björgunarsveitinni um helgina. Ég held að þau fari nú ekki nema að Djúpavatni sem er hér á skaganum. Hún nýtur sín vel í unglingastarfinu hjá þeim.... Og að mínu mati er það frábært áhugamál hjá henni.

Ég læt þessar hugleiðingar á meðan ég bíð eftir símtali frá DK (um að þau séu komin á völlinn) duga. Eigið góða helgi í blíðunni sem á að verða um allt land næstu daga. Og þið öll í USA, Dísa og co, Mummi, David ofl. Þið hafið oftast fárveður eða þannig.....ha ha.
Góðar stundir.
Silla.


 

02.07.2008 14:37

Merkilegt!


Halló öllsömul.
Það hefði einhvern tímann ekki verið fréttnæmt að það kæmi rigning. En ég var bara fegin að það rigndi í gærkvöld og nótt. Það var allt orðið skrælnað. Rúmar þrjár vikur og ekki dropi úr lofti. En þessu fylgdi auðvitað rok og var svo hvasst í gær á hestamannamóti á Hellu að þar fuku tjöld og eyðilögðust tjaldvagnar.

En það spáir aftur blíðu um helgina. Og það um allt land. Jóhanna keyrði norður til Akureyrar í gær með tvo gutta með sér. Þar er að byrja fótboltamót. Garðar Ingi og Jenni vinur hans (sonur Inga Sumarliða) eru að fara í nokkurskonar fótboltaæfingabúðir og Jóhanna gistir hjá Lillý systir.
 
Ég var nú í símanum í gærkvöldi að fylgjast með því að þau kæmu heil á húfi norður... Erla Jóna og Ágúst voru líka á norðurleið og ég frétti af þeim í gegn um Jóhönnu. Þessar ömmur. Hann er líka í fótboltanum en var svo óheppinn að handleggsbrotna illa í leik fyrir hálfum mánuði. En mamma hans er með honum ásamt Hörpu Jóa Brands sem er með sinn strák og vonandi hefur Ágúst gaman að því að fylgjast með þó að hann geti ekki tekið þátt.

Ég var að elda handa strákunum í Fúsa í hádeginu. Þeir voru það margir heima en fara líklega upp í Búrfell í dag. Þar eru tveir að vinna núna. Vona bara að allt gangi vel hjá þeim. Þetta er nú svolítið glæfralegt að sjá þarna... En þeir eru með öll öryggistæki, líflínur ofl.

Læt þetta duga í dag. Líði ykkur sem best.
Silla í Heiðarbæ. 

Flettingar í dag: 173
Gestir í dag: 17
Flettingar í gær: 74
Gestir í gær: 32
Samtals flettingar: 124568
Samtals gestir: 26580
Tölur uppfærðar: 21.7.2024 06:23:19