Færslur: 2007 Desember

30.12.2007 17:30

Árið 2007 senn á enda.



Heil og sæl. Nú er árið senn á enda. Næst síðasti dagurinn í dag. Þetta er búið að vera viðburðaríkt ár hjá okkur. Flutt í Heiðarbæ, yngsta barnið hún Linda gifti sig, David og Stacey giftu sig líka í Hvalsneskirkju, við gömlu áttum 40 ára brúðkaupsafmæli, ég komin á ææ sjötugsaldurinn. Skrítið, finnst ykkur það ekki líka? Ha ha.

Svo fórum við í lengra ferðalag en við höfum áður farið. Allt til Kanada og niður til Flórida. Svo ekki þurfum við að kvarta yfir tilbreytingarsnauðu ári. Aldeilis ekki. Þetta hefur að flestu leyti verið gott ár. En alltaf um áramót hugsar maður bæði aftur og ekki síst fram á við. Því vissulega má margt bæta.

Við skelltum okkur á hjónaball í gærkvöld. Fórum fyrst til Sólrúnar og Óskars og síðan saman upp í Samkomuhús. Maður var nú svolítið að spá í því fyrirfram hvort við værum ekki eins og öldungar í hópnum. En þetta var fólk á öllum aldri eins og best er á kosið og fullt hús. Við gengum í hjónaklúbbinn árið sem hann var stofnaður. Ég held 1973.

Maður hitta þarna marga sem maður hafði ekki séð lengi. Það var sko reglulegt fjör. Ég hef kannski innbyrgt fullmikinn vökva. Var örlítið þreytt í dag!! Allavega finnst mér nóg komið að sinni! En þetta var gaman og Bjössi bróðir skutlaði okkur heim tímanlega. Ég talaði við Gullu og Ævar. Þau ætla að taka smá pakka fyrir mig til Mumma. Bara svona að gamni. Þau eru að fara út til hans í Sívætlu 10.janúar.

Annað kvöld, Gamlárskvöld ætlum við að vera í mat hjá Fúsa og Erlu Jónu. En mig langar að vera komin heim fyrir Skaupið því nú sjáum við loks vel alla sjónvarpsdagskrána. En það er nú notalegt að þurfa ekki að elda..og vera með allavega hluta af fjölskyldunni síðasta kvöld ársins.

En ég ætla að enda bloggið mitt þetta árið núna og vitna í bók sem ég fékk í jólagjöf. Þar er vitnað í marga fræga húmorista frá ýmsum tímum. Winston Churchill sagði..Svartsýnismenn sjá vandamál í hverju tækifæri... Bjartsýnismenn sjá tækifæri í hverju vandamáli. Er þetta ekki bara fínt inn í nýja árið. Og endilega verum bjartsýn.

Gleðilegt nýtt ár og kærar þakkir til ykkar sem nennt hafið að kíkja á skrifin mín.
Silla í Heiðarbæ.

27.12.2007 12:48

Jólarest.


Nú eru blessuð jólin liðin.
En eftir smá hlé kemur önnur helgi og svo áramótin. Einhverjir fá ágæt frí nú í skammdeginu. Hjá okkur hér í Heiðarbænum var notalegt. Við fórum í messu kl. sex á aðfangadag. Ég hef aldrei gert það áður. Fór oft í kirkju á jóladag en einhvernvegin var maður fastur í þeim sið að borða hátíðamatinn kl. sex á aðfangadagskvöld.

 En þetta var hátíðleg stund og ég get sko vel hugsað mér að gera þetta að venju. Engin börn heima að bíða eftir pökkum. Krakkarnir okkar vilja öll vera heima hjá sér það kvöld. Ég er búin að liggja í bókum og bíómyndum yfir hátíðirnar. Í gærkvöld vorum við með hátt í tuttugu manns í mat og það gekk allt vel. Fyrsta sinn sem svo margir borða í einu í nýja húsinu. (Reyndar var haldið upp á afmæli Vilmundar í ágúst). Eftir að vera búin að ganga frá því mesta (og jafna mig)....fór ég að lesa aftur og las til tvö í nótt. 

Var með svo spennandi bók að ég gat ekki hætt. Hún heitir... Hvar eru börnin? Var fyrst gefin út á íslensku 1985 og er eftir Mary Higgins Clark. Hin bókin sem ég var að lesa er Útkall. Segir sögu björgunar sjóliðanna á Trinton og Wilson Muuga málinu. Ótrúlegt að lesa um þessar hetjur sem við eigum á þyrlunum. Líka ótrúlega seiglu Dananna sem komust af. Og undarlegt að hugsa til þess hvað þetta allt gerðist nærri okkur hér..

Já maður er eiginlega búin að snúa við sólarhringnum. Það þarf nú að fara að vinda eitthvað af því dæmi. Gunni er miklu hressari og hefur náð að hvíla sig og dofinn er minni. Svo vonandi er þetta að fara. En það eiga samt eftir að koma niðurstöður úr rannsóknum.
 
Dúna systir og Þröstur voru hér í gærkvöld. Mamma hans dó á jóladag og það eru tveir mánuðir síðan pabbi hans lést. Það er ekki alltaf langt á milli hjóna. Stundum svolítið sérstakt. Það liðu aðeins 40 dagar á milli andláts foreldra Gísla hennar Maddý (Möggulóu).

Læt þetta duga í jólarest.
Hafið það sem best.
Silla.

P.s.  Lítil dama fædd hjá Huld frænku á Húsavík!!


24.12.2007 00:38

GLEÐILEG JÓL!


Gleðileg jól, gott og farsælt komandi ár til ykkar allra lesenda síðunnar 123.is/heiðarbær og annarra!!
Nú var Heiðarbæjarkellan að ljúka við að skúra og sjóða hangikjötið..umm ætla að smakka. Enn og aftur líði ykkur sem best!
Jólakveðja..Silla og Gunni.

22.12.2007 21:40

Jólaljósin lýsa..

Sæl öll.

Nú eru jólin, hátíð frelsarans að svífa inn til okkar mannanna barna. Allir eða flestir hlakka til jólanna. Það eru þó ekki allir jafnir. Víst eru þeir það fyrir augum Guðs en í veraldlegum skilningi ekki! Sumir eru bara hreint á götunni. Alveg sama hvað hver segir um ástæður þessa þá er það þannig.

Og þó fólk sé ekki á götunni þá eiga margir erfitt. Og það er örugglega sárara um jólin en endranær að skýra út fyrir börnunum að kaupið sé ekki nógu hátt til að kaupa og kaupa!!! En hvað erum við að kaupa svona mikið Íslendingar? Er ekki nær að reyna að eyða smá stund með elstu og eða yngstu meðlimunum frekar en sitja föst í umferðinni sérstaklega á höfuðborgarsvæðinu í leit að einhverju til að kaupa..

Og svo er miklu betra að versla bara á Suðurnesjum. Sparar tíma og þar með höfum við meiri tíma aflögu í alvörumálin SAMVERUNA. Það hefði afmælisbarnið viljað. Allir hljóta að vita að við erum að halda upp á afmæli HANS Jesú Krists. En það eru ekki allir sammála um dagsetninguna sem mér finnst algjört aukaatriði. Við erum að fagna lífi frelsarans og fæðingu.

Nú er ég orðin svolítið háfleyg. Dúna syss myndi segja að það væri af því ég væri komin í sóknarnefnd.. Nei en ég var bara ekkert að hugsa um það. Kannski kemur að því að ég fari að prédika yfir ykkur elskurnar (bara djók). En hér gistir Vilmundur Árni í nótt. Hann ætlar að sofa á milli ömmu og afa. Og hlakkar til..

 Mamma hans vinnur í Bónus myrknanna á milli núna. Ein af þeim sem ekki hefur of mikið til að moða úr en með vinnusemi og hjálp gengur það upp. Og dóttirin Ástrós er perla. Aðeins 14 ára og dugleg í skóla. Er með með þeim hæstu í einkunnum og er dugleg að hjálpa til á heimilinu.. Ömmustelpa!!!

Garðar Ingi er í góðu yfirlæti hjá Diddu og þvílíkt hvað þessi fjölskylda reynist Jóhönnu vel. Þau eru í einu orði sagt frábær!
En nú er kominn tími til að hætta þessu pikki og ég vona að ykkur gangi vel að pakka inn!

Bestu jólakveðjur!

                                                                                                                        

20.12.2007 21:13

Umferð og skammdegi.


Nú er ég í tölvunni hans Gunna..sem er svo miklu fullkomnari en mín litla fartalva. En það stjórnar ekki skrifunum. Nei það mun alltaf mannshugurinn gera. Hér við hliðina á mér er Vilmundur Árni sex ára í tölvuleik. Kappinn vinur minn. Við erum að passa hann núna og hann er svoooo góður!

Já þetta er tölvuherbergið okkar!  Ég held satt að segja að það sé komið til að vera aðalherbergi hússins, þó það sé ekki stórt. Það eru flestir tölvuvæddir og msn er heimur sumra. Ég hef verið á msn og það er bara gaman. Nokkurskonar símasamband eða þannig. Var oft á þessu í Miðtúninu.

En dagurinn í dag var svona kannski dæmigerður eða þannig. Við mamma fórum af stað úr Sandgerði um ellefu og hún átti tíma hjá lækni rúmlega eitt. Það gekk nú eftir áætlun og svo var ég búin að mæla mér mót í millitíðinni við Grétu mömmu Lilju tengdadóttur og það gekk vel..Jólapakkar og fleira fóru á milli bíla.

Síðan skruppum við upp í Breiðholt með pakka fyrir Eyju. Það gekk vel að lokum og svo fórum við í kaffi til Maddý og Gísla í Heiðarásnum. Næst fórum við í Bónus og Rúmfatalagerinn og mér fannst mjög gott að fara heim á leið eftir alla þessa mannmergð. Og ég sem er vön í útlandinu! Já og samt eru fjórir dagar til jóla!!

Svo lá leiðin í Keflavík í apótek og fleira. Á eftir var mömmu komið til síns heima í Miðhúsum. Síðan sótti ég Vilmund. Þá var kukkan orðin rúmlega sex. En Jóhanna mamma hans og Konný eru að klára jólainnkaupin og svo verður hann sóttur eftir það. 

Hann hefur áhyggjur af því að jólasveinninn finni hann ekki!! En ef hann sofnar hér hjá ömmu og afa þá held ég að sveinki finni hann bara. Sko ef hann hefur verið stilltur í dag.. Hann er það hér..ljúfur og góður.

Bráðum koma blessuð jólin 
börnin fara að hlakka til.

Og kannski fleiri ! Bestu kveðjur Silla.

19.12.2007 23:08

Ár frá strandi Wilson Muuga.


Já það var ár í morgun frá strandi Wilsons Muuga eða Villa eins og við kölluðum hann. Og það hefði verið allt bara sæmilegt að segja um þennann atburð ef ekki hefði það sorglega gerst að einn sjóliði af Triton danska varðskipinu hefði látið lífið.

Það gekk eins og í lygasögu um miðjan apríl að koma honum burtu og við sáum ekki eftir honum! Ónei.. Hann blasti við út um stofugluggann hér í Heiðarbæ þegar við vorum að sparsla og vinna. En við fluttum inn mánuði seinna og þá var vinurinn farinn.

Þegar þetta gerðist í fyrra var ég að hlusta á áttafréttirnar og Gunni frekar seinn, var að fara í vinnuna. Þá var sagt að skip væri strandað sunnan við Sandgerði. Ég sagði við Gunna ..láttu mig vita hvar þetta er. Vegna þess að fyrir sunnan Sandgerði er svolítið teygjanlegt!

Hann hringdi eftir eina mínútu og sagði ..þetta er bara hér hjá Bala. Reyndar frá okkur séð var þetta rétt hjá okkur. En strandstaðurinn var reyndar innan marka Hvalsneshverfis í sirka eins kílómetra fjarlægð í beinni línu.

Ég skellti mér úr skúrnum (Bjössahúsi) til Benna og Ölla í kaffi og þar fylgdumst við frændsystkynin með atburðunum. Fyrst var skipið með fullum ljósum en síðan slökknuðu þau. Já það var átakanlegt með sjóliðann danska. Þegar birti ef hægt er að kalla birtu á þessum tíma sáum við skipið betur.

Já það er búið að skrifa, sjónvarpa og segja svo mikið frá þessu öllu að það er ekki neinu við að bæta hér. En ef þið viljið skoða myndir frá þessum tíma þá tók Bjössi bróðir(linkur til hægri) mikið af myndum á þessum tíma og ég svo seinna þegar hann var dregin út.(kominn með bloggið)

En að öðru..Ég var á safnaðarfundi Hvalsnessóknar í kvöld. Þar var ég kosinn nýr fulltrúi í stjórn ásamt Karli Ottesen. Mig hlakkar til að takast á við þessi verkefni þó svo að maður viti ekki mikið um þessi störf enn sem komið er. En ef viljinn er fyrir hendi þá tekst þetta örugglega. Það eru sjö manns í stjórn.

Læt þetta duga sem aðventuinnlegg í bili.
Kveðja Silla.

18.12.2007 20:19

Tölvuherbergið!


Jæja, heil og sæl.. Í Heiðarbænum okkar er tölvuherbergi..auðvitað, ég sem er alltaf að blogga!  En við vorum ekki raunverulega búin að búa það vel út fyrr en í dag. Við fórum í Ikea í gær í vitlausu veðri að kaupa skrifborð..En ekki eitt heldur tvö. Já..já..........

Ég sagði við Frikka svila minn sem var að aðstoða okkur við uppsetninguna að þetta væri eins og með gömlu hjónin sem vildu sofa í sitt hvoru rúminu. Bara tvö skrifborð i staðinn. Og þá læddi hann út úr sér..Já af því það er bara pláss fyrir eitt hjónarúm hjá ykkur! Hm.
En þetta er frábært. Gunni með heyrnartækin í einhverjum tölvuleik..  Æ.. æ tvisvar verður gamall maður barn....En þetta er það sem honum finnst afslappandi og því ætti ég að vera að væla yfir því!

En annars er allt gott að frétta og lífið gengur sinn vanagang. Ég fór í pósthúsið með kort fyrir mömmu og nokkur fyrir okkur sem eiga að fara út á landsbyggðina. Annars eru flestir þar tölvuvæddir ..en þetta er gamall vani líklega, hjá mér.

Á morgun ætla ég að vera eitthvað með Vilmund Árna. Jóhanna mamma hans vinnur sem aldrei meir nú fyrir jólahátíðina og komið frí í skólanum. Á fimmtudag fer ég með mömmu til læknis í árlega skoðun.

Svo þið sjáið að ég sit ekki alveg auðum höndum..ónei aldeilis ekki. Frekar finnst mér að það vanti tíma í sólarhringinn, allavega stundum.
Já svo á elsta barnið mitt afmæli í dag. Fúsi orðinn 39...En elskurnar mínar bestu kveðjur í jólaönnunum.
Silla.

16.12.2007 15:35

Afmæli hjá Arnari Smára.


Arnar Smári Hannesson varð tveggja ára í gær. Hann er næstyngstur barnabarnanna. Yngst er maddama Hrafntinna Jónsdóttir. En hún er svona rétt á hælunum á honum verður tveggja ára 27.janúar. Og hún er að fá systir eða bróðir í maí n.k. Og Arnar Smári var hress á afmælisdaginn sinn. Hann er svo mikið krútt strákurinn, rauðhærður með krullur!

Sniðugt hvernig þetta tvinnast saman. Ég meina ættir. Hannes pabbi hans er barnabarn Hannesar heitins á símstöðinni og Önnu ljósu sem tók á móti helmingi af okkur systkyninum og svo Jóhönnu minni sem var með síðustu ljósubörnunum hennar. Og eldri strákurinn þeirra Konný og Hannesar heitir Jóhann Sveinbjörn í höfuðið á pabba Hannesar sem drukknaði þegar Hannes var um sjö ára. En svona er þetta líf.

Nú erum við komin í jólaskapið gamla settið. Búin að vera að greiða úr seríum og taka upp jólaskraut sem hefur flest ekki verið notað síðan í Miðtúninu jólin 2004. Það var takmarkað sem við höfðum pláss fyrir í Bjössahúsi (skúrnum). Og svo komu Fúsi, Erla Jóna og Ágúst í gærkvöld og Fúsi tengdi fyrir mig græjurnar!! Já og það hafa sko verið spiluð jólalög í dag.

Já og jólakortaflóðið!! Ég ætla að senda takmarkað af kortum núna. Er búin að senda jólakveðjurnar í útvarpið. Það verður bara að hafa það ef fólk heyrir þær ekki. Fyrir mig  persónulega er frábært að hafa þessar lesnu jólakveðjur. Eitthvað tengt hefðum.. Mér finnst jólin vera að koma þegar ég elda hangikjötið laga til og hlusta á kveðjurnar. En ég er nú hálf skrítin . Svo ætla ég að nota netið og senda sumum í gegn um tölvuna mína.

Jæja, læt þetta duga af jólahugleiðinum, afmælum og fleiru góðu. Látið ykkur líða vel.
Kv. Silla.

14.12.2007 11:03

Hitt og þetta.


Það er nú bara klisja ef ég tala enn um veðrið. En? Hvað er í gangi með þessi óveður. Dúna systir segir að við eigum að flytja á Kópasker. Þar sé alltaf logn nema þegar hvessir  Já ég get trúað því. Við höfum oft reynt að segja þetta á Suðurnesjum en fólk vill ekki trúa okkur..ææ. .Af hverju ekki. Annars held ég að þó að snjói vel stundum á þau fyrir norðan þá fái þau ekki svona lægðasúpur. Þær koma víst oftast upp að suður og vesturströndinni.

En að öðru. Siggi Jóns (linkur til hægri á síðunni minni) var að tala um á blogginu sínu um m.a konuna sem var sett í fangelsi af því hún var ekki með Visa. Vegabréf sem hún hefði þurft af því hún hafði dvalið lengur í BNA fyrir 12 árum en hún hafði ráðgert. Þörf umræða hjá Sigga. Og mér skilst að hundruð Íslendinga hafi skrifað comment á bloggsíðu konunnar um málið.

Þetta þarna úti er náttúrulega bara klikkað. Ég veit ekki hvað er að hjá þeim. Fyrst þegar við vorum að ferðast þangað virkaði þetta jú kannski strangt, vel skoðað og slíkt ok. En núna er viðmótið allt annað og ég vil segja kuldalegt. Held ekki að þessir ungu fjölskyldumenn séu slæmir menn. En þeim hlýtur að vera sagt að vera ógnandi og hranalegir. Jafnvel öskrandi í Hitlersstíl! Við erum alltaf dauðfegin þegar við erum komin í gegn.

Kannski vilja Bandaríkjamenn bara alls ekki ferðamenn inn í landið. Það er þó mótsögn í því. Allir þessir skemmtigarðar sem eiga að laða að fólk alls staðar úr heiminum. En þetta viðmót sem ég var að tala um á bara við þessa aðila sem taka á móti okkur við komuna til landsins. Hinn almenni borgari er kurteisin uppmáluð. Og allt fólkið okkar, frændfólk og vinir eru æðisleg.. Heyrið það Dísa, Nonni ,Kathy og öll hin!! En the Immigration er eitthvað sem þeir verða að laga. 

Í haust fórum við yfir landamærin til Kanada og þar voru verðir laganna hinir ljúfustu. Ekki fyrirfram ákveðnir í að við værum ótínt glæpalið eða þannig. Og allt gekk smurt fyrir sig. Ég tala nú ekki um frændur okkar Dani. Miðað við allt þarna í BNA eru þeir bara ligeglad og brosa framan í okkur eins og við séum svona venjulegar manneskjur. Já ættum við bara að brosa að þessu þarna í BNA? Nei það er ekki hægt. Og ég vona svo sannarlega að konan verði beðin afsökunar.

En þetta er nú að verða svolítið langt. En eitt, Gunni var sendur á LSH í aðra rannsókn í gær og á að fara í fleiri eftir helgi. Svo kannski fari eitthvað að skýrast í þessu dofa -þreytumáli. Læt staðar numið eftir þennan reiðilestur með meiru.
Bestu kveðjur.

12.12.2007 22:25

Bingó!


Ég var að koma úr bingó í skólanum. Þar var mjög fjölmennt. Bingóið var haldið til styrktar krökkunum sem fara til Danmerkur í hina árlegu ferð. Ástrós og mamma hennar kannski ekki síður hafa verið duglegar í söfnuninni. Þarna voru tvær dætur mínar og sex barnabörn . Reyndar þreyttust yngstu tveir og farið var með þá til Hannesar í pössun.

En ekki fengum við nú mikið af vinningum enda aðalatriðið að vera með og styrkja málefnið. Reyndar fékk Gunnar Borgþór vinning. Og við mæðgurnar fengum hláturskast þegar við fengum allar þrjár bingó í einu ásamt fleirum eins og stundum verður. En engin okkar fékk nú vinninginn. En þetta var fyndið! Og svo flýtti ég mér heim í Heiðarbæinn því enn á ný spáir ofsaveðri. Er ekki allt í lagi með veðursystemið?

En svo finnst mér nú persónulega en fæ ekki neitt að ráða því  að þessar vorferðir ættu að vera til vinabæjar Sandgerðis Vogs í Færeyjum til að kynnast jafnöldrunum þar og rækta frændsemina við þau. En þetta virðist vera orðin hefð að fara til Danmerkur.

Dagarnir síðan ég kom heim hafa farið í þetta venjulega stúss..Elda fyrir Fúsafólk og snúast smá fyrir þau eldri. En á föstudagskvöldið ætlum við að fara níu saman á sýninguna hans Ladda í Borgarleikhúsinu. Fólk segir að hún sé alveg frábær. Veitir ekki af að brosa og létta sér upp í þessum óveðurslægðum sem koma hér upp að landinu annann hvern dag.

En vona að við og þið sofið vel í nótt. En það blæs ansi vel á okkur og maður verður hugsi ..Er nokkuð laust sem fýkur..Í fyrrakvöld fauk kassi sem ég hélt að færi hvergi og ybbaðist aðeins upp á bílinn minn!! En bara smávegis sem betur fer.
Bestu kveðjur.
Silla.

Fimmtudagsmorgunn 13.12. kl.10.30... Sennilega hefur veðrið verið verst t.d í Borgarnesi og á höfuðborgarsvæðinu en nóg var nú samt hér en ekkert skemmt að því ég best veit. Kv.S..


10.12.2007 22:13

Úr þoku í rok og grenjandi rigningu!



Heim erum við komin gamla settið..Og það gekk bara ljómandi vel að ferja okkur á milli landa! Vð prufuðum að fara styttri leið milli Lysabild og Kastrup en við höfum áður farið. Hún er fólgin í ferjuleið sem liggur milli Fynshav (Fjónshaf) og Báden á Fjóni. Þaðan keyrðum við svo rakleitt yfir Stórabeltisbrúna til Sjálands og þar með Kastrupflugvallar.

Frá Lysabild og Eiríks fjölskyldu til Fynshav eru bara tíu mínútna keyrsla.. Og það var svolítið sérstakt fyrir okkur að sjá allstaðar merki ..lýsandi ..Tága .Já þeir láta svona sérstaklega vita að það sé þoka. Gott hjá þeim. Aldrei of varlega farið. Í morgun var jú þoka en ekki svo rosaleg.

Og svo þegar við vorum búin að vera á flugvellinum dulítinn tíma þá var kallað upp að vélin okkar myndi verða of fljót!! Jæja svo sem bara 10 mínútur en flugáhöfnin sagði að heima væri við það að skella á stormur. Og við hugsuðum sem svo áhöfnin vildi bara að flýta sér heim!

Og það spáði ofsaroki sem við sluppum við..Aðeins ókyrrð og vindur í lendingu..En núna klukkan rúmlega tíu er sko brjálað veður..Svo það má segja að í logninu og þokunni á morgnanna í D.K séum við í öðrum heimi miðað við þetta. En samt..Heima er best.

En við grillum ekki úti Eiríkur eins og síðustu daga. Og þið sem talið um að það sé ekki góð tíð!! Jamm. Og Helgi Snær mundu eftir að skrifa komment.
Kveðja úr Heiðarbænum.

Seinni skrift!! Allt upp í 60 metrar á sek. mældist í gærkvöldi eftir að ég skrifaði þetta. Ekki stætt úti!!
Kv. Silla.

  

09.12.2007 18:22

Hjá barnabörnunum á Jótlandi.

 
Já nú erum við hjá Sigurbjörgu, Helga og Þorsteini og Helgi er að kenna mér að skrifa á íslensku á skrítið lyklaborð!!!! æææ...en það kemur..

Vissi ekki að þetta væri hægt svo skrítnir stafir i staðinn fyrir okkar. En við erum búin að hafa það mjög gott hér og förum heim i fyrramálið.

Svo við komum heim um miðjan dag. Og það hefði verið gaman að vera á 120 ára afmælishátíðinni hjá Hvalsneskirkju i dag en svona er þetta bara..Reyndar er afmælið sjálft um jólin..

Svo við bara hittumst vonandi fljótlega.. Spáir ekki vondu veðri eða hvað... vonandi flugfært..eins og oftast. Við sjáum íslenska sjónvarpið hér..Þau eru með þannig disk. 

Bestu kveðjur úr Gammelhave 20. Lysabild Sydals Jylland.

Silla og allir hinir.


07.12.2007 15:52

Lysabild i D.K



 Hæ nu erum vid komin til Eiriks, Lilju og barnanna theirra i Sönderborg a Jotlandi. Reyndar nokkra kilometra uti i sveitinni i litla thorpinu sem thau bua i Lysabild. Yndislegur litill bær.Thad var audvitad gaman a bada boga ad hittast. Mikil gledi hja okkur nuna.

Vid stoppudum i K.hofn a leidinni og hittum Lillu og Kæju og forum ut ad borda med theim i gærkvoldi. Vid forum lika i Fields sem er verslunarmidstod rett vid borgarmorkin.

En vid keyptum ekki neitt thar. O nei ekkert spennandi fyrir okkur. Vid ætlum med fjolskyldunni herna i budir a morgun. That var lika ætlunin..

Og nu er eg komin i tolvuna hja Eiriki og læt ykkur vita af okkur her med!! Skrifa kannski a morgun lika. Gunni er bara nokkud hress en dofinn er ad pirra hann svolitid og fer ekki.
 
Vid sloppudum samt vel af og lulludum og doludum okkur i Kopenhagen i jolaljosadyrdinni..
En her erum vid nu a Jotlandi..

Svo sendum vid bestu kvedjur til ykkar allra.
Kvedja Silla ..

04.12.2007 07:22

Morgunstund.


Góðan daginn!

Morgunstund gefur gull í mund segir gamalt máltæki.

Það er nú stundum gott að lúra á morgnana í mesta skammdeginu. En stundum erum við bara morgunhanar eins og núna. Helltum á könnuna rúmlega sex!! Gott að vakna snemma og hafa daginn fyrir sér. Það er ekki nema rétt sólarhringur þar til ætlunin er að taka á loft til Danaveldis. Svo það þarf að huga að mörgu í dag. Safna saman jólapökkum til barnabarnanna, kaupa malt og appelsín og fleira í þeim dúr.

Heilsan er að lagast hjá Gunna..verður bara að sætta sig við þennann dofa. Svo ef ekkert annað pirrar, gengur það nú upp. En annars gengur allt sinn vanagang núna og það styttist í jólin. Mér finnst nú notalegt að heyra eitt og eitt jólalag. Léttir lund í skammdeginu og krakkarnir farnir að hlakka til jólanna.

Lilla vinkona er úti í Köben og við ætlum að hitta hana ef við getum. Hún á systir þar, Kæju sem við höfum einmitt heimsótt en það var 1989..Orðið ansi langt síðan..Tíminn flýgur á undraverðum hraða stundum. En hvað um það..Segir okkur að lifa í augnablikinu og vera góð við menn og málleysingja. Ekki gera á morgun það sem hægt er að gera í dag.

Ég held að við þurfum að taka með okkur peysur húfur og trefla. Það er oft kalt á þessum árstíma í Danmörku.

En ég læt þetta duga að sinni. Lifið heil..
Silla.

02.12.2007 22:09

Týra og Benni.


Já það er nú það.
Ég á tvo pínulitla hunda af Tjúáakyni. Það kyn er komið frá Mexicó. Týra mamman er 75% og Vikký ca 90%.  Annað hundakyn sem blandast þeim er Pekingkyn.
 
En þið sem hafið lesið bloggið mitt vitið þetta. Og líka að Vikký heitir raunverulega Victoria og er fædd 4. júlí sl.og fædd með þrjá fætur!! Það vantar á hana annann framfótinn...En hún er svo dugleg að við tökum ekki eftir því svona að öllu jöfnu.

Og auðvitað kom ekki til greina að láta hana frá okkur og Gunni var ákveðnari en ég í því. Vikký skal verða Hverfishundurinn á Stafnesinu. En enn er hún bara að verða fimm mánaða og ekki alveg orðin fullorðin.
 
En út frá þessu ætlaði ég að segja ykkur að hún verður í pössun hjá Jóhönnu og hennar börnum og Brúnó hundi þegar við förum til Eiríks og fjölskyldu.

En það svo mamman Týra....Drottningin sjálf.....Hún dýrkar Benna, Ölla og Bjössa svo það liggur í augum uppi að hún fái að vera hjá þeim þessa daga. Og ég talaði við Benna í kvöld og hún verður sko pottþétt hjá honum kellan. En annars vona ég sannarlega að af ferðinni verði til D.K.

Gunni er enn lasinn.. Hann er svo máttlaus og það er ekki það sem ég er vön og hef dálitlar áhyggjur af. Reyni bara að leyfa honum að sofa og hvíla sig og safna kröftum..Er búin að moka í hann vítamíni og lýsi og vona að allt verði í lagi. En það eru bara tveir sólarhringir rúmlega þar til við eigum að mæta í flug.

En að öðru..Hræðilegt með drenginn hans Óskars Sólmundar..Hann varð fyrir bíl þar sem bílstjórinn stakk af og er dáinn elsku strákurinn. Guð varðveiti mömmuna, pabbann og alla aðstandendur. Óskar pabbi hans eða Sigurður Óskar eins og hann heitir er vinur Eiríks. Þetta er skelfilegt... Lengi skal manninn reyna.

Ég vona að allt sé í lagi með mín börn og barnabörn.. En eitt er víst..Það að við eigum ekkert sjálfgefið......

Takk fyrir að lesa og biðjum bænirnar okkar!
Ykkar Silla.
Flettingar í dag: 45
Gestir í dag: 7
Flettingar í gær: 27
Gestir í gær: 22
Samtals flettingar: 429490
Samtals gestir: 101133
Tölur uppfærðar: 24.7.2021 02:06:10