Hæ í dag var ég bara löt. Ferming Ástrósar yfirstaðin og fór vel fram. Veislan tókst vel og ekki að heyra (og sjá) annað en fólki líkaði matföngin. Það var nóg til af öllu og við vorum í rest hjá Jóhönnu í dag. Það voru um 100 manns í fermingarveislunni.Svo nú er bara spennufall hjá mér. Í dag er föstudagurinn langi og Linda, Hrafntinna og mamma komu í heimsókn áðan. Þær fóru í kirkjugarðinn og voru að snudda við leiðið hans pabba. Mamma fór svo út að taka myndir í sólinni af húsunum og umhverfinu.
Hún sagði okkur að þau pabbi hefðu á föstudaginn langa 1945 ákveðið að rugla saman reitum og þetta er því mikill merkisdagur fyrir hana. Og kannski ekki síður fyrir okkur þessa stóru fjölskyldu sem væri bara ekki til ef það hefði ekki gerst....Þau eignuðust sex börn og afkomendurnir eru orðnir 67. Mamma er einbirni svo hún bætti heldur betur við í sínum ættlegg. En eins og ég sagði áður dó pabbi fyrir tíu árum .Hann var tæpum 12 árum eldri en mamma fæddur 1914 en hún 1926. Hún er sem sagt áttatíu og eins árs og þvílíkt í góðu formi. Það sem háir henni er heyrnin. Heyrir rosalega illa. En viðkvæðið hjá henni er að það sé nú í fínu lagi hún hafi svo góða sjón. Ekkert væl nei nei. Ég held að hún telji sig heppna í lífinu en fyrir utan pabba hefur hún séð á eftir einni dóttur, henni Möggu árið 2005 og drengnum hans Bjössa, honum Sigga. Það var rosalegt áfall, því hann var aðeins 18 ára og lést í bílslysi árið 2005. Þau tvö dóu með tveggja daga millibili. En mín kona lætur ekki biturð krækja í sig og sér björtu hliðarnar á lífinu.

Að öðru, Eiríkur kom í stutta heimsókn frá Danmörku. Hann fór í morgun. Var að setja bílinn á sölu og ætlar að kaupa annann úti. Hann fær víst einhverja ofurskatta ef hann heldur þessum bíl. Hann var duglegur að hjálpa og sendast í gær og sagðist vera að leggja inn.. ha ha. Hann á son Þorstein Grétar sem fermist á næsta ári. Krakkarnir í fermingarveislunni lögðu inn fullt af pöntunum á róbótum hi hi. Hann er í námi í  rafmagnsverkfræði með róbótanám í framhaldi. En ætli þeir spretti nú fljótt upp. En námið gengur vel og hann var með þeim hæstu í bekknum í vetur. Háskólinn er í Söndeborg á Jótlandi.

Jæja næsta mannfagnaðartörn verður þegar David og Stacey gifta sig þann 26. mai. Koma hingað 19.mai með hóp af fólki. Þá verður fjör á bæ....
Góða Páskahelgi kæru vinir....

Jæja ég var að koma heim rauð í framan eins og epli.Var á fullu í matargerð og slíku. Nú er bara að ná sér niður fyrir svefninn ha ha.
Og á leiðinni heim blasti Wilson vinur við allur upplýstur og mikið um að vera þar. Svo það hefur verið rafstöð sem þyrlan var að flytja út í hann um daginn.
Jæja stóri dagurinn hennar Ástrósar fer að renna upp. Hún verður fermd klukkan 10.30 í fyrramálið í Safnaðarheimilinu í Sandgerði. Mér hefði nú fundist flottara að fermast í kirkjunni á Hvalsnesi en svona er þetta bara. Meirihlutinn valdi Safnaðarheimilið. Ástrós sjálf hefði kosið kirkjuna en ég held að það hafi fáir viljað það svo...Annars er þetta í fínu lagi.

Sigfús syngur í kórnum, ekki verra að eiga móðurbróður sem syngur fyrir fermingarbarnið. Annars var svolítið skondið um daginn. Það var verið að jarða tengdaföður Sigfúsar frá Keflavíkurkirkju og kór Hvalsneskirkju sá um sönginn. Sá gamli hafði beðið Sigfús að syngja yfir sér og allt gott um það að segja.
Hann var einnig líkmaður og sem slíkur gekk inn í byrjun athafnar. Stóð svo næstum strax upp og stormaði fram gólfið. Þeir sem ekki vita að hann syngur í kór hafa efalaust orðið hissa. Hvað var hann að æða í burtu og verið að jarða vin hans og tengdapabba. Já það er ekki alltaf allt sem sýnist.

Það er orðið dulítið framorðið og stendur til að vakna snemma.
 Svo góða nótt til ykkar allra.

 Jæja nú er allt komið á fullann skrið hjá mér og Jóhönnu .Taka úr frysti, skrifa niður það sem vantar :skipuleggja...
Það voru bara óvenjumargir í mat hjá mér áðan í Fúsa ehf. Við vorum átta samtals. Þó var Fúsi fyrir austan fjall.
Erla Jóna vinnur af krafti með þeim núna og í morgun var Ísar frændi að hjálpa tíl.

Og það er víðar nóg að gera. Það er fjöldi manna við Wilson Muuga að vinna. Þeir eru að koma með mikið af allavega farmi sennilega dælum pressum og fleiru. Ég held að það verði byrjað á fullu eftir páskahelgina. Já það er óskandi að björgunaraðgerðirnar takist.

Það þýðir ekki að hanga í tölvunni núna. Hlutir gerast víst ekki af sjálfu sér.
Hugsið vel um ykkur..

Jæja það er 1.apríl í dag. Ég hljóp ekkert april. En ég hef stundum gert það. Þegar ég var ca 12 ára hringdi Sigrún vinkona á Melabergi og bað mig að fara og gá að Lubba hundinum sínum, hann væri týndur. Ég segi henni að bíða í símanum og hleyp út í dyr hér í Nýlendu og kalla Lubbi Lubbi þó nokkra stund. En nei enginn Lubbi og ég í símann og segir þá ekki Sigrún 1.april la la. Ég varð HUNDfúl það man ég.

 Svo tókst Jóhönnu að láta mig hlaupa april daginn fyrir ferminguna sína. Hún fermdist 2.apríl 1989. Þetta var nú svona smá grín...
En við vorum í fermingarveislu hjá Þórunni Önnu í dag og þá hafa allir krakkarnir hjá Bjössa bróður fermst. Það var gaman að systur mínar Dabbý og Laufey gátu komið að norðan. Alltof sjaldan sem við hittumst. Thelma dóttir Dabbý var með. 
Í dag eru líka 10 ár frá því pabbi dó. Fljótur að líða tíminn.
Þegar við vorum á leiðinni heim í dag voru Óskar og Sólrún að koma og við stoppuðum til að bjóða þau velkomin úr sólinni. Þetta var að þeirra sögn alveg frábær ferð og frábrugðin því sem þau höfðu kynnst.

Við kíktum í heimsókn í Glaumbæinn í gærkvöld. Maddý og Gísli eru komin heim frá Flórida.
Nú fer að koma að þvi að bretta upp ermar í skipulagningu og matargerð. Ástrós fermist á fimmtudag.Úps..

Ég hef þetta ekki lengra í bili. Góða nótt..

Jæja nú er laugardagur og ég er að fara á eftir inn í Sandgerði í Fúsa ehf. Það þarf að gefa vinnudýrunum að borða eitthvað. Þetta er nú fullmikið af vinnu ekki síst fyrir þá sem nálgast sextugt, ha. En svona er þetta nú bara nú um stundir.
Vona bara að það fari að koma tími í Heiðarbæinn. Súld úti núna en ég held að það sé vor í lofti.  Nú nálgast ferming Ástrósar hratt og þar verð ég með puttana í matseldinni..Jæja það gengur vonandi vel. Á morgun fermist Þórunn Anna yngsta barn Bjössa bróður. Hún er reyndar eins og ári á undan sér fædd í lok desember 93 og þá fyrir tímann.  En hún hefur nú aldeilis spjarað sig og er mjög fín stelpa.

Já það er gaman að sjá póst frá David í gestabókinni og svo kom póstur frá Sigurði Jóns frá Tenerife. Gaman! Sýnir okkur líka hvað heimurinn er orðinn smærri þannig.  Fólk í öðrum heimshlutum eins og Mummi í Seattle hafa færst nær einhvernvegin. Næsti stóratburður hjá okkur eftir fermingu Ástrósar verður svo 26.maí þegar David og Stacey gifta sig í Hvalsneskirkju. Og síðan ætla Linda og Jón að gifta sig 8. september.  Daginn eftir eigum við gömlu 40ára brúðkaupsafmæli. Það verður nóg að gera hjá Gunna að leiða brúðir inn kirkjugólfið í sumar. Hann leiðir Stacey líka..

Nú er fjör í firðinum.. Hafnarfirði. Í dag kjósa þeir um stækkun Álversins í Straumsvík með eða á móti. Það sagði einn að það ríkti borgarastyrjöld þar með erlendri íhlutun! Jæja vonandi verða dýrin í skóginum vinir á eftir hvernig sem fer.
Það verður gaman að fylgjast með í kvöld.  Þetta er ekki algengt að fólk fái yfirhöfuð að kjósa svona.  Það vakna upp ýmsar spurningar. Skilar fólk sér á kjörstað eða verður lítil þátttaka og þá lítið að marka niðurstöður.

Jæja læt þetta duga í bili. Góða helgi.

Jæja. Nú er umhverfisráðherra Jónína Bjartmarz búin að tilkynna okkur að Villi eigi að sigla í mai. Gott mál ef það gengur eftir.  En ég segi nú eins og bæjarstjórinn okkar hann Sigurður Valur..við skulum spyrja að leikslokum.  En óskandi er að þetta takist nú allt saman. Vonandi verða allar myndirnar sem við höfum tekið af Wilson bara til minja.  Reyndar fer líklega eftir veðri hvort þetta tekst í maí en því verður nú varla trúað annað en þá verði reynt þar til það tekst, þó seinna verði.  Þá verður búið að leggja kostnað í að þétta skipið og gera klárt svo það hlýtur bara að gerast.. Nema það neiti að fara sjóleiðina..Svo eru uppi vangaveltur um að hann fari kannski að sigla aftur..Kannski það! Jæja nóg af Wilson vesini í bili.

Ég tók mig til í dag og tók myndir af húsunum hans Gunna eins og ég kalla það.  Hann er búin að byggja fjögur einbýlishús eitt parhús, eitt fjórbýlishús og er með eitt þríbýlishús í smíðum í Sandgerði. Það þýðir að það er búið í níu íbúðum sem hann hefur byggt og væntanlega kemst þríbýlið í notkun í haust. Og svo er það Heiðarbærinn. Það er íbúð númer þrettán (happatala). Elsta húsið er Hlíðargata 37 sem við fluttum inn í 1975.  Þar vorum við í 23 ár og ólum upp krakkana og hvort annað!  Við bjuggum í Miðtúni 10 og þaðan fórum við hingað í skúrinn hans Bjössa í nóvember 2005. Og nú er bara að bíða eftir lokasprettinum svo við getum flutt í Slotið..ha ha.  Jæja ég ætla að setja þessar myndir inn á síðuna en Konný ætlar að skanna mynd af Hlíðargötunni, ég ætla að bíða eftir því. Húsið er svolítið breytt núna og erfitt að taka myndir af því fyrir bílum og fleiru.  Betra að hafa mynd af því eins og það var.

Jæja ég var að passa guttana hennar Konný í dag. Svo tók Ástrós við þeim þar til mamman kom heim. Hún og Jóhanna fóru í R.víkina. Alltaf nóg að gera og undirbúa hjá Jóhönnu í sambandi við ferminguna. Það er best að hætta þessu blaðri.
Farið nú vel með ykkur góurnar mínar.

Já við fórum í fermingarveislu í gær . Þá fyrstu á þessu ári.  Bárður Gísli yngri fermdist og við Gunni, Bjössi og Þórunn Anna fórum saman.  Hún fermist um næstu helgi. Og þegar við komum heim var Dúna litla systir, Laufey Björg dóttir hennar með soninn og mamma mættar í Nýlendu. Gaman, það er langt síðan ég sá Dúdú..Þær voru að kíkja á Heiðarbæinn í leiðinni. Svona til að sjá hann með eigin augum þarna í Nýlendugörðunum..
Í dag var ég svo að hjálpa mömmu að sinna ýmsu í Keflavík.  Fermingargjöfum og slíku stússi.  Annars lítið að frétta allt of mikið að gera í vinnunni hjá Gunna.  Hann er ekki lengur 20 þó hann haldi það stundum.. Það var bara blíða í dag, FRÉTT.
Jæja segjum þetta gott í bili. Góðar stundir.

Ja hérna. Í dag er mánuður frá fyrsta blogginu. Fljótt að líða. Ég hef reynt að hafa það á frekar léttum nótum og um daginn og veginn. Og vonandi eitthvað af viti innan um. Það eru komnar nokkrar myndir í viðbót inn en ég þarf að gera betur í þeim málum. Það kemur allt með kalda vatninu. Í dag var ég að passa Vilmund smávegis, elda fyrir vinnudýrin mín því það er unnið á laugardögum sem aðra daga um þessar mundir. Sigfús og Gummi upp í Steingrímsstöð að blása og mála.
Vilmundur spyr mikið um þá, af því þeir séu undir vatninu. Er það furða, fimm ár guttinn.
Ekki er lát á umhleypingunum en við búum jú á Íslandi og maður ætti ekki að vera að þessu væli.
Jæja nóg að sinni. Hafið það gott um helgina.

Gott kvöld...Ég var að koma úr saumaklúbb. Komið fram yfir miðnætti svo ég ætla að vera stuttorð. Enda búin að tala og hlægja frá mér allt vit. En svona eru saumaklúbbarnir okkar. Það er reyndar ein sem vinnur handavinnu með...
Sigrún á Melabergi eins og hún var kölluð í den. Og stundum Lilla Árna sem er frá Landakoti. Aðrar í kvennaklúbbnum eru  Helga Eyjólfs, Eydís Guðbjarnadóttir og Lilla í Kef. Svona er þetta sundurliðað. Og núna vorum við hjá Lillu í Kef. (Einu sinni Lillu hans Kidda.)
Það var fjör hjá okkur og það er alltaf. Hittumst reyndar bara einu sinni í mánuði og bara yfir veturinn......

Annað ,Jón Hrafn hennar Lindu dóttur minnar var í viðtali á Íslandi í dag á stöð tvö. Hann tók þátt í iðnnemakeppni í Kringlunni. Hann er að læra múrverk og er ansi flinkur og enda stúdent  með einn vetur í Háskólanum í verkfræði. Góð undirstaða fyrir námið. Hann er að æfa sig fyrir Heiðarbæinn.. að ég held!!  Hann ætlar, kannski með öðrum að leggja flísar fyrir okkur. Hann vann í dag og fékk verðlaun og svo er þetta bara gaman. Linda kíkti á staðinn með dóttluna og lenti í útsendingu. Ef þið viljið skoða þá farið bara á vísir.is og á Ísland í dag 23.mars. Jæja best að fara að halla sér. Sofið rótt í alla nótt...

Í dag er síðasti dagur framteljenda á netinu. En það er hægt að fá smá frest. Það er einn af kostum netvæðingarinnar að hægt skuli að telja fram á netinu. Og það hvað skattayfirvöld hafa gert allt auðveldara í kring um þau mál.
Ég sendi inn fyrir elstu kynslóðina og allt kemur forskráð og það þarf bara að samþykkja og senda. Þvílíkar framfarir. Ég finn það vel því í mörg ár hef ég gert skýrslur fyrir vini og ættingja. Og maður var að leggja saman og reikna vexti og afborganir, tína allt saman ofl. Nú sjá bankarnir um það fyrir fólk sem stendur í slíkum málum. Meirihluta þjóðarinnar líklega. Eina sem ég þarf að vinna svolítið hjá okkur persónulega er húsbyggingarskýrslan. Já netið er bylting. Eins og t.d. blogg og slíkt. Gott tæki til skoðanaskipta eða bara eins og mitt hérna í léttum dúr með ívafi. En eitt er það sem gæti skemmt fyrir bloggfólki eins og mér og fleirum.  Það ef fólk skrifar ekki undir nafni. Það finnst mér lélegt. Fólk hefur sem betur fer ólíkar skoðanir á ýmsu en lágmark er að skrifa undir nafni. Reyndar hefur enginn nafnlaus komið inn hjá mér en ég hef séð þetta sumstaðar og þá oft þegar fólk er með hálfkveðnar vísur.

Já best að koma sér að verki, segi þetta gott í bili. Farið gætilega með ykkur.
Það er úti veður vont einu sinni enn. Kveðja.

Ég fékk SMS frá Sólrúnu frá Kario. Hún sagði að þau væru í skýjunum yfir öllum aðbúnaði. Hafði aldrei séð annað eins. Þetta væri eins og fyrir forseta. Ég fékk hláturskast og sendi henni á móti og spurði hvort hún væri ekki með FORSETA ha ha. En annars, þetta er víst þvílíkur lúxus. Gaman fyrir þau. Annars var í fréttunum að það hefði komið upp fuglaflensutilfelli í Egyptalandi einhversstaðar. Vonandi einangrað tilfelli.

Í dag byrjaði ég eftir nokkurt hlé í sjúkraþjálfun í Átak og var svo heppin að fá sama þjálfarann. Hún heitir Dagbjört og er einstaklega elskuleg stúlka. Svo þurftum við Ástrós að erinda ýmislegt og í leiðinni var farið í sendiferðir fyrir elstu kynslóðina, ömmurnar í Miðhúsum. Nú virðist aftur vor í lofti, hvað sem það helst lengi.

 Í gær fengum við Gunni blaðamann frá Víkurfréttum í heimsókn í Heiðarbæinn. Það var Ellert Grétarsson sem einnig er með bestu ljósmyndurum. Ekki veit ég nú hvort hann getur galdrað einhverjar fínar myndir af okkur gamla settinu. Varla ha ha. Mér skilst að þetta viðtal eigi að koma í Tímariti Víkurfrétta. Reyndar veit ég lítið um þetta, sjáum bara til. Ég held allavega að Heiðarbærinn sjálfur sé í aðalhlutverki. Hann er flottur þó ég segi sjálf frá. Og þegar okkur tekst að klára dæmið og allt umhverfið eins og ætlunin er kemur það betur í ljós. Þá set ég nýjar myndir á síðuna.

Nú líður að fermingum. Bárður Gísli Guðjónsson fermist 25.mars, Þórunn Anna dóttir Bjössa á að fermast 1.april. Ástrós Anna dóttir Jóhönnu 5. apríl. Jónína fósturdóttir Dúnu 7.apríl og Thelma dóttir Dabbý 19.apríl . Já það verður nóg að gera þennan mánuð...Og mér finnst svo stutt síðan þessir krakkar voru með bleyju. Segir til um aldur annarra ekki satt?  Nú fer ég að hætta þessu pári..Lifið heil.

Hæ aftur. Við buðum Benna frænda í mat og erum búin að hafa það kósý í kotinu. Vorum í Heiðarbæ seinnipartinn en það varð nú ekki mikið um framkvæmdir. Meira spáð og spekulerað sem þarf líka. Við keyptum okkur borðstofusett í dag í Bústoð og borðið er frábært með mikla stækkunarmöguleika. Ætli sé ekki þörf á því þegar margir koma í einu? Og þá verða kannski fleiri í mat en núna ,allavega stundum.

Nú eru allir að fá boðskort frá David og Stacy og mamma fékk það sama dag og hún gifti sig fyrir 60 árum 15. mars .Hún var mjög ánægð með það. Gæti verið lukkumerki fyrir væntanlegt brúðarpar!  En ég er farin að halda að við náum ekki að flytja fyrir brúðkaup æ æ. Allavega ekki í fullgert hús. Enda allt í lagi okkar vegna en þá verðum við að leita að fleiri gistiplássum. Væntanlega verða það 15-20 manns sem koma frá USA 19.maí n.k. Við erum að plana ferð með hópinn um Suðurland og vonandi gengur það eftir áætlun.

Jæja best að fara fram í STOFU og spjalla við Gunna og Benna.
Hafið það sem allra allra best.

Maður fer nú að verða svolítið þreyttur á veðráttunni. Enn á ný snjókoma eða slydda og ekki hundi út sigandi. Týra greyið rétt skreppur og kemur svo inn skjálfandi. Hún er sko hundur. Reyndar sagði Bjössi bróðir fyrst þegar hann sá hana fyrir nærri þremur árum: Þetta er ekki hundur, þetta er undur!  En hún er smá og Bjössi og Ölli eru bestu vinir hennar. Nú er 30 stiga hiti í Flórida þar sem þau eru núna Maddý Gísli og Ölli. En þau missa ekki af neinu í veðurfarslegu tilliti. Ónei..En annars spáir björtu á morgun. Nóg af veðri.
Var í morgun á K-listafundi. Þar komu saman vel flestir sem skipuðu listann í kosningunum á sl.ári, ásamt öðrum sem starfa fyrir K-listann. Þessir fundir á nokkurra mánaða fresti eru mjög gagnlegir og upplýsandi. Margir á listanum eru formenn nefnda og fróðlegt að heyra hvernig gengur. Það er ótrúlegt hvað þessi baktería endist þó maður sé hættur! Jæja best að fara að gera eitthvað í Heiðarbænum. Gunni er meira að segja heima aldrei þessu vant. Sólrún og Óskar eru að fara til Egyptalands á morgun. Það hlýtur að vera áhugavert og kannski á maður eftir að fara á þær slóðir seinna. Jæja þetta var dagbókin fyrrihluta dags laugardaginn 17.mars!!!!
Góða helgi öll sömul.

Jæja ekki gat þessi bannsett flensa sleppt mér alveg. En þetta er allt í áttina núna. Slapp örugglega betur en margir. Ég er búin að vera eins og skælandi alla vikuna , augun á floti. Hvað er það miðað við svo margt. Alltaf jafn mikið að gera hjá Fúsa ehf. Núna eru þeir uppi í Steingrímsstöð við sandblástur ofl. Þeir segjast vera 20 metrum undir Þingvallavatni. Úff best að hugsa ekki um það.
Hilmar tengdapabbi hans Sigfúsar dó í nótt. Það urðu bara rúmlega tvö ár á milli hans og konunnar , Ólu. Jæja svona er lífið.
Ég kom aðeins til Erlu tengdadóttur minnar áðan og hún er nú bara hress.

Að öðru.  Mér fannst gaman að fá gamlan bekkjarbróður í heimsókn á síðuna ,hann Hafstein. Mér finnst maður vera búin að tína of mörgum úr þessum fámenna hóp sem var saman í skólanum hér í Sandgerði. En þetta er bara svona. Gunni man eftir mjög fáum úr skólanum í Hafnarfirði.
Svo þetta er líklega bara gott hjá okkur...En ég hef haft mest samband við Hrefnu og hitti stundum þá sem eiga heima hér um slóðir. Það eru Jóhann, Stína, Elsa, Gunnar Páls og Birna. Svo höfum við Mummi verið í tölvusambandi í nokkur ár. Jæja það er bara nýtt líf að keyra Stafnesveginn núna miðað við í síðustu viku ..Hm.. En það þarf auðvitað að gera hann betur upp í vor. 
Best að hætta þessu rugli í bili. Rugla meira seinna það megið þið bóka.
   Lifið heil. 

   Jæja við sem erum fædd árið ,haldið ykkur, 1947 eigum náttúrulega svolítið stórt afmæli á þessu ári. Við erum ekki með bleyju eins og þessi á myndinni, það er nú kostur. En auðvitað snúast augun í okkur vegna þess að við trúum þessu ekki. En nú ætla ég að upplýsa leyndarmál..ha ha. Mummi verður sextugur á morgun. Hann býr úti í Seattle og getur því falið sig fyrir okkur. EN á morgun 60 ára takk fyrir, þann 14. mars. Og fyrst ég er byrjuð að skandalera þá ætla ég að upplýsa um þá sem ég man eftir. Birna Margeirs á afmæli 20. mai. Hrefna vinkona á afmæli 2. nóvember ,Skúli Sigurðs er fæddur 2. desember. Ég á afmæli 29.maí, verð að heiman ,pottþétt.  En það þyrfti að upplýsa um fleiri sem eru að verða svona ungir eða þannig. Bjössi bróðir er alltaf að stríða mér á hvað ég sé gömul en alltaf lallar hann í humátt á eftir mér. Munar þrem árum, hvað er nú það? Jæja hvað um það. Maður er ekki degi eldri en manni finnst maður vera.

Góðar stundir.