Heiðarbær

28.06.2008 18:46

Er von á regni?

Sæl öll sömul. Það hefur ekki verið bloggveður undanfarið. Það hefur verið sól stanslaust í þrjár vikur eða síðan við settum torfið á blettinn. En það gæti verið að breytast eitthvað. Spáin hljóðar upp á smávegis rigningu á morgun. En það hvessti allverulega í dag og er hávaðarok núna.

Hulda vinkona mín og skólasystir síðan í Reykholti kom í gær í heimsókn og ég fór með hana í bæinn í dag. Þar hefur hún búið eftir nám en er frá Bakkafirði. Árni Snær sonur Maddý og Gísla fékk far með okkur. Hann var að fara í vinnu og er nýkomin frá Flórida þar sem hann var í húsinu sem foreldrar hans eiga í Jackssonville.

Við Hulda höfum alltaf haldið góðu sambandi í þessi 45 ár sem liðin eru síðan við vorum saman í herbergi í Reykholti. Ég í landsprófi og hún tók gagnfræðaprófið. Hvortveggja eru nú börn síns tíma (þau námsform)..En Hulda hefur alla tíð unnið í Búnaðarbankanum nú Kaupþingi. Stundum líða nokkur ár á milli þess að við hittumst en þeim mun styttra á milli þess að við heyrumst.

En ég er enn að passa Svandísarvoffa. Þau hjónakornin framlengdu fríinu til mánudags eða um fjóra daga. Fínt hjá þeim. Það gengur bara vel með ferfætlingana og þeir eru orðnir næstum eins og heima hjá sér. Ég hef orðið góð tök á uppeldinu. Tek Týru afsíðis þegar þau eru úti. Þá gegna þau mér en þegar Týra er með tekur hún strauið á hina bæina. Ég er nú ekki alltof hrifin af því að hinir elti.

En ekki fleira í bili. Læt heyra í mér ef að fer að rigna. Eigið góða helgi gæskurnar.
Kveðja Silla.

20.06.2008 20:18

Blíðan og sumarsólstöður.

Gott kvöld... Eða ætli það sé nokkuð komið kvöld. Það er allavega svo bjart og ekki eins og sé að koma nótt. Enda lengstur sólargangur framundan. Á miðnætti held ég að sé tíminn. Og dagurinn í dag var hlýr og varla að maður kvarti yfir því.

Ástrós og Garðar Ingi voru hér í dag og vinur Garðars. Ég var að skutla þeim í bíó strákunum og mamma Davíðs vinar hans sækir þá á eftir. En ég hef verið ein með blessuðum hundunum að öðru leiti. Og búin að vera að bleyta í blettinum. Í gær fór ég með mömmu í flug. Hún var að fljúga til Akureyrar. Hún er í sinni árlegu sumarferð til sinna norðlensku dætra og afkomendanna allra. Gaman að því hvað hún er hress og nýtur þess að fara norður.

Gunni er að koma úr sinni annarri ferð í dag upp í Búrfellsvirkjun. Hann þurfti að fara með varahluti og ég á ekki von á honum fyrr enn klukkan tíu. Þá ætla ég að grilla handa þreyttum bóndanum.. Sko ég kann alveg að grilla en mér hefur fundist ágætt að segja að hann kunni það svo miklu ,miklu betur!

En veðrið er þannig að ég ætla út aftur og ekki eyða of miklum tíma í blogg. Það koma örugglega bloggdagar seinna ef maður þekkir veðráttuna rétt hér á landi.

Kveðjur til ykkar allra úr Heiðarbæ.
Silla.

17.06.2008 12:58

17.júní!

Hæ hó jibbý jei og jibbý jei, það er kominn Sautjándi júní. Og merkilega gott veður. Sól og blíða en dálítill vindur. Í fyrra var ég fengin á síðustu stundu til að halda þjóðhátíðarræðuna. En nú er allt vel undirbúið og ég vona að Sandgerðingar fjölmenni á hátíðahöldin. Það var sett sérstök sautjánda júní nefnd eins og þarf raunar að vera ef vel á að takast til. Ég var í slíkri nefnd í hittifyrra og Erla Jóna tengdadóttir er í henni núna og nóg að snúast hjá henni.

En ég held að ég hafi varla sleppt því að fara á hátíðahöldin síðan 1994 en þá var ég nýkosin í bæjarstjórn og hélt mína fyrstu ræðu..skjálfandi á beinum. En það tókst bara vel. Og auðvitað vorum við fjölskyldan vön að fara á hátíðahöld dagsins frá því við fluttum til Sandgerðis. Ég á myndir af fjölskyldumeðlimum sem ekki voru háir í loftinu 1974 og þá voru hátíðahöldin alltaf haldin á Bjarmalandstúninu.

En seinna voru þau oftast við skólann og íþróttahúsið. En núna verða þau við Vörðuna nýja stjórnsýsluhús bæjarins. Þar er orðin mjög góð aðstaða bæði úti og inni. Málverkasýning er inni í kaffisalnum og þar á mamma myndir ásamt Bjössa sem einnig býr í Miðhúsum. En sýningin mun standa í nokkra daga.

Ég veit ekki hvort ég nenni núna sjálf. Gunni og Fúsi eru í Örfirisey að ganga frá eftir blástur og málningu. Svo ég er ein heima ásamt fimm hundum sem þurfa smá athygli. Svandísar voffar eru í pössun! En ég ætla að sjá til hvort ég skelli mér

...

En stóra fréttin er skírn Júlíu Lindu Jónsdóttur sem fór fram á laugardaginn síðasta. Hún var auðvitað eins og engill og Gunni hélt henni undir skírn. Stoltur! Mér finnst nafnið flott og gaman að því að hún ber sama nafn og vinkona mín. Sú er reyndar Ómarsdóttir. Og hún var í ljósmæðranámi þegar Linda fæddist og kom í rútu úr bænum til að taka á móti henni eða þannig.. Æfing...undir handleiðslu Sólveigar sem var jú ljósan. En síðan eru liðin rúm 25 ár. Fljótur að líða þessi tími!

Læt þetta duga að sinni. Ég er ekki of dugleg að blogga svona í sumrinu. Mikið útivið með græna fingur. Líði ykkur öllum sem best.

Silla í Heiðarbæ.

12.06.2008 20:12

Búrfell.

Góða kvöldið. Ég var að koma frá Búrfelli. Fór á Gunna bíl og hann á vörubílnum. Hann var með verkfæri, sand og fleira handa strákunum. Við lögðum af stað héðan fyrir hádegi og svo þurfti að ná í hitt og þetta. Sigfús og Árni eru byrjaðir upp frá og þurfa að nota lyftuna á vörubílnum. Ég var nú búin að hugsa mér að koma við í Árnesi en það verður að vera bara í næstu ferð. Það er nú hálflýjandi að keyra svona í lotu báðar leiðir. En það er þó malbik alla leið. Veðrið frábært og of gott til að sitja og keyra.

En svo er allt orðið svo þurrt að ég reyni að vökva nýja blettinn annað slagið. Það mætti alveg koma demba núna. En þetta er bara eins og fínasta græn kápa. Og það með kraga. Hringurinn sem ég gerði kemur út eins og kragi!

Sigrún vinkona kom í fyrradag. Ég held að hún hafi verið búin að gera þrjár tilraunir til að kíkja á mig í Heiðarbæ síðan ég flutti. En það tókst að samræma okkur loksins

... Held að hún hafi bara verið farin að halda að ég vildi ekki fá hana í heimsókn.. Maddý kom með plöntur og setti í sárið við blettinn. Svo þegar þetta grær allt upp þá verður það orðið eins og við hefðum ekki hróflað við neinu. Eins og mikið umrót varð við byggingaframkvæmdirnar.

En svo eru komnir þrír hundar í pössun hjá mér. Svandís fór út í dag og þeir komu í gær. Þeir eru að sætta sig við breytinguna greyin og eru niðri í kjallara yfir nóttina eins og hinar. Nóg að gera. Ég læt þá í grind úti. Er svo hrædd um að þeir strjúki. Og af því ég var svo lengi að heiman í dag fékk ég Jóhönnu til að kíkja á þá. Hún átti frí aldrei þessu vant! Hún vinnur mikið.

En ætli ég hætti ekki þessu blaðri í bili.

Bestu kveðjur.

Silla.

08.06.2008 19:54

Grasið grænt!

Sæl..

Já grasið er grænt og grænna hjá mér en hinum megin við veginn! Bara grín... Það er nú grænna hjá Bjössa held ég. En það sem ég ætlaði að segja ykkur er að við settið vorum að tyrfa hjá okkur. Og við höfum eitt síðustu tveim dögum í djobbið og erum alsæl. Byrjuðum þegar torfið kom klukkan tíu í gærmorgun og vorum að til fimm. Og svo vaknaði maður með græn augu í morgun klukkan níu og ÚT..Búin klukkan fjögur!

Í upphafi þegar við horfðum yfir blettinn sem átti eftir að fá gras vorum við sammála um að þetta væru svona 100-200 fermetrar. Svo fór Gunni að mæla og útkoman var 400 fermetrar. Æ æ nóg að gera og svo var spurningin hvort við ættum að sá eða tyrfa. En í jarðveginum var smágrjót sem ekki hefði passað við sáningu svo útkoman var að tyrfa.

En nú er þetta komið og bökin eru lúin. En það jafnar sig og bara fínt að geta gert þetta sjálf án aðstoðar og fengið útivistina í æð um leið. Í gær var reyndar hellirigning og fötin fóru beint í þvottavélina. En dagurinn í dag var flottur, sól og blíða.

Á föstudagskvöldið komu vinir okkar Sólrún og Óskar í heimsókn. Alltaf gaman að fá þau. Á föstudaginn fórum við Gunni í Helguvík og vorum viðstödd skóflustungur að nýju álveri. Þar var margt um manninn og við fórum í Duushús og ætluðum að hlusta á ræðu Kristjáns Gunnarssonar en gáfumst upp vegna fjölmennis og hita. En ég fæ örugglega að lesa hana seinna!

En ég var þarna sem stjórnarmaður í VFSK. Og við erum sammála þar um ágæti þess að álver verði byggt í Helguvík. Ef einhverjir finna að skórinn kreppir að eru það verkalýðsfélögin. Og það finnst í dag..Það er pottþétt. Ég vona að umhverfissinnar séu sáttir því mengun verður innan ítrustu marka.

En að sinni ..Góðar stundir..

.....

Silla.

06.06.2008 11:45

Misjafnt.

Sæl öll. Eins og ég sagði síðast er ég hálflöt í blogginu um þessar mundir. Ekki að veðrið sé yfirþyrmandi gott.

..Nei sjaldan sólgleraugu þessa dagana. En það er gróðraveður eins og ég heyrði oft sagt í gamla daga svo það er bara að vona að sólskinið komi síðar. Eigum við ekki að segja að í júlí verði sumarið!

Ég þeyttist í Reykjavík kl. 8 í morgun til að sækja Gunna sem fór með bílinn sinn í venjubundna skoðun. Hann fór kl. 7 af stað og ég beið heima og sagði að ég tryði ekki að þeir lánuðu honum ekki bíl á meðan á þessu stæði. En ..nei takk það er ekki sama hvar maður kaupir bílana sína..greinilega! Það er ekki hægt að bera saman þjónustuna hjá mínu umboði sem er Bílabúð Benna og þessu sem er Ingvar Helgason.

Ekki nóg með það. Hann var án bílsins í þrjá mánuði í fyrra vegna galla. (Reyndar fékk hann annann á meðan það var) Þeir hefðu átt að kanna öll þau óþægindi og koma til móts við hann núna..En það var nú aldeilis ekki. Þetta er eitthvað annað en um daginn þegar ég þurfti að láta laga bílinn minn vegna þess að Gunni keyrði á steininn. Þar var lipurðin og þjónustulundin í fyrirrúmi hjá Bílabúð Benna. Og samt var þetta okkar sök.

Svo nú er Gunni á Captívunni minni í vinnunni. Tveir starfsmenn Fúsa eru í Örfirisey og tveir uppi í Búrfelli að koma sér fyrir. Þar er að hefjast um það bil þriggja mánaða vinna. Svo reddarinn Gunni er á þeytingi í hinu og þessu.

En í fyrradag fór ég í bæjarferð með Lindu og litlu dúllu sem var að fara sína fyrstu búðarferð. Reyndar sat amman með þá stuttu úti í bíl á bílastæðinu í Smáralind meðan mamman verslaði.

..Og í gær var elsta barnabarnið að útskrifast úr Grunnskólanum í Sandgerði. Það var Gunnar Borgþór yngri. Flott skólaslit í Safnaðarheimilinu og foreldrarnir buðu upp á kaffi og kökur. Friðrik Gunnar sonur Sirrý var líka að ljúka skólanum og það var mjög gaman að vera viðstödd. Þau voru 37 sem útskrifuðust og hafa aldrei verið fleiri í bekk. Það voru þessir krakkar sem ég var að sitja yfir í samræmdu prófunum. Öll alveg frábær..

En ég læt staðar numið í bili og hafið það sem best.

Silla í Heiðarbæ.

02.06.2008 21:43

Bloggleti!

Gott kvöld gæskurnar.

Stundum, ekki oft, kemur fyrir að ég kíki ekki á netheima. Ég er nefnilega býsna háð þeim nú orðið. Ég byrja morguninn á því að hella á könnuna og kíkja í moggann. Sko einu sinni hafði ég blaðið við hendina en nú er það í tölvunni minni. Því þegar maður er orðin dreifbýliskella þá er ekkert blað eldsnemma í lúgunni. Tvo aðra netmiðla kíki ég alltaf á. Það eru Lífið í Sandgerði og Víkurfréttir.

Reyndar fyrir nokkrum árum í fjögur ár var ég umboðsmaður moggans og sá hann klukkan fimm að morgni. Já og mér gengur illa að ná umboðsmannsnafninu úr símaskránni og í síðustu skrá er þessi blessði umboðsmaður búsettur hér í Heiðarbæ!! Hún er nú bara svona skriffinnskan. En það venst ágætlega að setjast við skjáinn og skoða. Og þá er heldur ekki eins mikið af pappír sem þarf að henda. Alltaf gott að sjá jákvæðu hliðar lífsins.

.. Er það ekki?

Reyndar er notalegt að setjast inn í stofu með kaffibollann og horfa út og yfir og spá í hvort einhverjir bátar séu í fiskeríi. Eða lambið hans Bjössa og kálfarnir að bíta gras og ærslast. Svo hlaupa hundarnir yfir til þeirra og hvað veit ég hvað þau eru að ræða sín á milli..(Ha ha ég er ekkert orðin elliær..bara í þykjustunni). Já og svo eru tvö yndisleg nýfædd folöld hér í nágrenninu. Þau eru í Bala.

Undanfarið hef ég ekki verið í eldabuskumálum í Sandgerði. Þeir hafa verið mest í burtu strákarnir í Fúsa. En alltaf getur maður haft nóg að gera samt. 14.júní á að skíra litlu skvísuna þeirra Lindu og Jóns. Ég fer nú að verða forvitin um hvaða nafn snótin fær. Í dag á Eiríkur 38 ára afmæli og í desember verður Sigfús 40 ára...Segir einhverja sögu um aldur foreldranna..hm.

Svandís kom í dag með hundana sína í heimsókn. Venja þá við. Ég ætla að passa þá fyrir hana meðan hún skreppur til útlanda í sólina. Þá verður örugglega mikið hundalíf í Heiðarbæ!! Þá breytist kjallarinn í flottasta hundahótel..

En að lokum ..Sofið rótt og hafið það sem best.

Ykkar Silla.

30.05.2008 14:14

Eftirminnilegur.

Sæl öll mín kæru!

Það var svei mér eftirminnilegur afmælisdagurinn minn í gær. Ég man örugglega eftir því hvar ég var stödd korter fyrir fjögur 29. maí 2008. Reyndar var ég í Bónus að kaupa á grillið handa börnum og barnabörnum og fann ekki jarðskjálftann sjálf. En allir hér Bjössi, Linda og fleiri gerðu það. Gunni var staddur í verslun í Reykjavík og var að hugsa um að hlaupa út. Ekki hefði ég viljað vera stödd fyrir austan fjall! Ég vorkenni fólkinu sem hefur sumt þurft að vera í tjöldum. Ýmsir hafa farið til Reykjavíkur til ættingja.

En við verðum að vona að þessu fari að ljúka en ennþá finnast eftirskjálftar sem fara þó minnkandi að sögn. Ég fór inn á vef Veðurstofunnar og kíkti á mælirinn hér í Nýlendu og það sést greinilega að eitthvað mikið hefur verið að gerast. Fínt að símasambandið var komið á því þeir geta þá kortlagt þetta blessaðir.

En í gærkvöld voru hér eins og ég ætlaði að segja öll börn, tengdabörn og barnabörn nema Danmerkurbúarnir Eiríkur og fjölskylda. Þar eru þau 5. Svo vantaði Ástrósu sem er í Danmerkurferð með skólanum. En hér í grillpartýinu vorum við 17. Svo að þegar við erum öll samankomin erum við 23.

Við erum svo sannarlega rík gamla settið. Svo gistu tveir bræður á loftinu í nótt. Þeir Garðar Ingi og Vilmundur Árni. Í dag er enginn skóli því það er starfsdagur kennara. En Jóhanna þurfti að mæta í Bónus kl.7 í morgun. Hún er yfir búðinni í hálfan mánuð meðan verslunarstjórinn Snorri er erlendis. Gott að vera ekki í Bónus á Selfossi að þessu sinni..Hrikalegt ástand hjá íbúum þarna fyrir austan.

En við megum búast við ýmsu á þessari eyju okkar. Það eru aðeins átta ár núna 17.júní n.k síðan síðustu Suðurlandsskjálftar dundu yfir.

En læt þetta duga í bili. Eigið góða helgi.

Kveðja Silla.....

....

28.05.2008 11:13

Blessaðir fuglarnir.

Góðan og blessaðan daginn. Hann er fljótur að líða tíminn og bráðum kominn júní. Það er rúmt ár síðan við fluttum í Heiðarbæinn. Reyndar fyrst upp á loftið. En í morgun fyrir klukkan níu var ég á leið í þjálfun og fer alltaf fram hjá æða og fuglavarpinu í Norðurkoti og Fuglavík. Það var sko margt um fuglinn í morgunkyrrðinni. Æðarpar sat á veginum og ætlaði bara ekkert að færa sig. En..vaggaði sér svo út fyrir. Já þau eru svo sæt þessar elskur og karlinn flottur á litinn.

Norðanfólkið mitt sumt er á faraldsfæti. Dúna og Þröstur komu við og eru að fara til Hollands í fyrramálið. Inga Þórey dóttir Lillý og fjölskylda eru flogin til Spánar og Bjössi lóðsaði þau upp í flugstöð í gærkvöld. Inga varð stúdent sl. laugardag og var ekki með veislu eða slíkt og valdi að fara frekar með manninn og tvíburana sína út.

Annars er allt gott að frétta héðan úr sveitinni. Maddý og Gísli eru að mestu í Glaumbæ. Skreppa í bæinn yfir miðja vikuna. Enda ekki langt á milli. Reyndar held ég því fram að það sé styttra til Reykjavíkur en til baka hingað.

..Það finnst allavega sumum sem þar búa.

En ég hef kannski ekki mikið fleira að segja ykkur í bili.

Hafið það sem allra best.

Silla

26.05.2008 15:43

Síminn til skammar!

Já það er ekki ofsögum sagt hvað þjónustan er léleg hjá símanum. Hvort það heitir Míla eða Sími veit ég ekki, fyrirtækið sem sér um viðgerðir þegar bilar. Slitinn strengur á laugardagsmorgun inn við íþróttavöll í Sandgerði þýddi sambandsslausir símar í öllum húsum þar fyrir sunnan alla helgina. Og þetta eru ekki bara símar. Ég veit til þess að Lauga í Hólkoti er með öryggishnapp sem auðvitað varð óvirkur um leið. Ekki mikið öryggi hjá gömlu konunni það.

En Veðurstofan er líka með jarðskjálftamælir hér í Nýlendu og þeir hafa verið að reyna að ná sambandi og höfðu samband við Símann um helgina vegna þessa. Auðvitað dettur allt slíkt út og nettengingin líka. Við sem erum í dreifbýlinu notum jú þann kost mikið. Ég les fréttirnar á netinu ofl.

En það sem hefur farið mest í skapið á mér er að alla helgina skrökvuðu þeir blákalt að okkur. Við höfðum margoft samband með gsm símum ( sem næst samband úr á vissum stöðum ef við erum heppin) og alltaf sagði starfsfólk Símans að verið væri að vinna í málinu. Hefði nú ekki verið nær að segja okkur satt að ekki yrði nein viðgerð fyrr enn á mánudag vegna þess hve við værum fá sem værum sambandslaus

.. Og ekki bera á borð fyrir okkur sem vorum búin að hafa samband úr öðrum símum að engin hefði hringt og látið vita. Ótrúlegt!

Jæja og ætli við borgum ekki líka síma og net. Og ég held að á þessum tíma árs séu milli 30 og 40 manns á svæðinu og tæplega 20 tengingar. Þetta er til háborinnar skammar og sýnir bara gróðahyggjuna sem hefur margfaldast með einkavæðingunni. Of mikil kostnaður að vinna helgarvinnu fyrir okkur..Ja svei.

En nóg um svona ham í bili. Eurovision var flott á laugardaginn og við lentum í 14. sæti. Mér fannst það bara fínt og þau stóðu sig vel Friðrik Ómar og Regína Ósk...

. Ég var úti að gróðursetja smávegis áðan. Var að koma fyrir græðlingum sem Maddý gaf mér. Þeir koma til með að gista á öðrum stöðum en það bíður betri tíma.

Við fórum í Borgarholtsskóla á laugardag til að vera við útskriftina hjá Hannesi. Mjög fínt og 195 útskriftarnemar af ýmsum brautum. En ég læt staðar numið hér í bili.

Bestu kveðjur úr Heiðarbæ sem er kominn í net og símasamband en með hrikalega lélegt GSM sem er nú reyndar ekki nýtt fyrir okkur.

Silla

...

22.05.2008 21:36

Eurovision og rok!

Hæ hæ. Við komumst upp úr þessum pytti.. undanúrslitunum..Einu sinni var þetta ekki vandamálið. En núna eru þjóðir Evrópu sem taka þátt orðnar svo margar að það þarf tvær undankeppnir. Og bara gaman að þau Eurobandið fái tækifæri á að reyna sig í aðalkeppninni á laugardag. Og ég yrði alsæl með 16. sætið þá..í alvöru..

Og í dag er búið að vera þvílíkt ROK..Ég horfi angistaraugum á plönturnar sem ég fékk hjá Ásu í Glitbrá um daginn berjast í vindinum. Ég vona það besta því vindurinn er hlýr og vorið hefur vonandi yfirhöndina.

Og betri helmingurinn er allur að koma til..Hann situr hér við hliðina á mér í tölvunni sinni og ég næ ekki sambandi við hann í augnablikinu.

. Ég er alveg sátt við það því við eigum sko öll rétt á að að eiga áhugamál í tómstundunum. Ég blogga um þetta og hitt og honum finnst það bara fínt..Les það stundum og stundum ekki.

En það verður greinilega fjör á laugardag. Euróvísion fjör. En þessi dagur er samt dagur afreka og það verður haldið upp á það..Hannes tengdasonur útskrifast sem vélvirki og við ætlum að fara í Borgarholtsskóla og samfagna með honum. Og á eftir förum við í kaffi í Miðhúsum og þar verður líka bróðir hans Siguróli og þeir ætla saman að halda upp á að hann er orðinn stúdent og Hannes vélvirki!

Elskurnar mínar. Hafið það sem best!

Kveðja úr Heiðarbæ

21.05.2008 11:50

Fastur í bakinu !!!

Já sæl verið þið.

Svona gerist stundum (hjá ellismellum)..

..að festast í bakinu með miklum verkjum. Gunni var að bogra yfir sturtunni í gærmorgun og ég heyrði bara öskur og hann rétt komst upp í rúm og var þar að mestu í gærdag. Erla Jóna kom með hitapoka sem hefur örugglega hjálpað auk bólgueyðandi lyfs sem við áttum. Svo í morgun (í seinna lagi) fór hann allur skakkur í vinnuna. Hann ætlaði að reyna eitthvað við tölvuvinnu. Ég held að það verði ekki nein erfiðisvinna unnin í dag. En það er gott að þetta er að lagast því eins og þeir vita sem fá svona í bakið þá er það sko ekkert grín.

Ég sjálf þekki þetta frá fyrri tíð. Og taldi mig reyndar ekki ellismell þá! Og heldur ekki í dag ha ha....Á árunum 1983-1986 fékk ég að meðaltali svona skelfilega í bakið á sex mánaða fresti. Og gat mig hvergi hrært í einn til þrjá daga í einu. Talið var að þetta væri brjósklos sem læknirinn vonaðist til að gengi til baka. Og það gerði það að vissu marki.

Ég átti því láni að fagna að eiga frábærar vinkonur sem komu daglega og oft á dag til mín. Þar var Lilja Karls mín helsta stoð ásamt Hrefnu. En 1992 kom brjósklosið út annarsstaðar þ.e. í efri hluta hryggjarins. Það var slæmt og leiddi niður í handlegg í stað fótar. En þó aldrei eins slæmt og það fyrra því maður gengur jú ekki á höndum ..eða ekki ég. Að lokum var ég svo skorin við brjósklosi árið 1993 og hef verið fín í baki síðan... Ætti ég ekki að segja 7-9-13...

...

En að öðru leyti er allt fínt að frétta. Litla stelpan nýfædda dafnar vel hjá Lindu og fjölskyldu og Hannes hennar Konný útskrifast á laugardag úr sínu fagi. Það verður kaffi hjá þeim bræðrum í Miðhúsum á laugardaginn og nóg að snúast....

...

En þar til næst hafið það sem best.

Silla.

18.05.2008 18:16

Fólk og dýr í Stafneshverfi.

Halló öllsömul. Nú hefur verið svo fínt veður undanfarið að blogg og svoleiðis hlutir mæta afgangi. Hér í hverfinu er mikið líf og fjör. Það eru þrír kálfar úti á túni hjá Bjössa bróður og eitt lítið lamb. Heimalningur.....

..Og hann er alveg æði! Hann eltir Bjössa húsbónda sinn á röndum. Gæti frekar verið hundur að því leiti. Þessi elska gerir mannamun því hann eltir ekki hvern sem er.

Kálfarnir vekja mikla eftirtekt þeirra sem fara hér um á helgarrúntinum. Fólk hefur sagt við mig að svona sjón sjái þau ekki á öllum Reykjanesskaganum. Það gæti reyndar alveg passað því kúabúin eru löngu aflögð hér um slóðir. Svo eru hross í Bala sem Mummi á og þar er lítið folald. Svo þið heyrið að fjörið er hér...

....Það eru margir að setja niður kartöflur og fleira. Benni var á fullri ferð í vikunni. Ég sá að Rúnar í Bala og frú voru að stússa í dag. Ég fór í hjólreiðatúr og það var hressandi. Svo var ég líka að klára hringtorgið mitt.. Ekki spyrja hvað ég meina bara kíkja í heimsókn og sjá.

..Gunni og félagar voru að vinna í dag í Örfirisey.

Maddý og Gisli eru komin heim frá Flórida og auðvitað mætt í Glaumbæinn. Við tókum hús á þeim í fyrrakvöld og stoppuðum í tvo tíma. Það var margt spjallað og við fengum heilmikið að vita frá ferðum þeirra í suðurríkjum Bandaríkjanna. Þar var rætt um ferð til Rósu frænku og byggingaframkvæmdir í Jacks. Svo voru David og Stacey hjá þeim í Jacks og þau skoðuðu Townhúsið þeirra í Atlanta.

En ég hef verið að fylgjast með moggabloggi þegar veður hefur leyft og þar sá ég að Milla okkar sem bjó lengi í Sandgerði er skráð. Svo um daginn lét ég slag standa og skráði mig á bloggið það. Hm. Það er ansi gaman að vera með í því þegar tími gefst og ég er búin að blogga við nokkrar fréttir. En ég fer mér hægt í byrjun því það stendur ekki á að finna veika punkta hjá manni í svona opinberu spjalli. Það er reyndar allt í lagi og bara gaman að því.

En nú ætlum við hjúin að grilla svo þar til næst ..eigið góðar stundir.

Silla.